Þessi grein birtist upphaflega í Stundinni fyrir meira en 4 árum.

Íbúð á 345 milljónir til sölu í Reykjavík

Dýr­ustu íbúð­ir Ís­lands­sög­unn­ar eru komn­ar á sölu og fást á allt að 345 millj­ón­ir króna. Fleiri bað­her­bergi en svefn­her­bergi eru í dýr­ustu íbúð­un­um. 70 lúxus­í­búð­ir koma á sölu.

Íbúð á 345 milljónir til sölu í Reykjavík
Bryggjugata Dýrasta gata Reykjavíkur. Mynd: Davíð Þór

„Ég er búinn að vera fasteignasali í yfir tuttugu ár og þessi vara hefur ekki verið á markaði. Þetta er eitthvað annað,“ segir Óskar Harðarson, fasteignasali hjá Mikluborg, sem í dag setti formlega á sölu dýrustu íbúðir Íslandssögunnar, við Bryggjugötu í miðborg Reykjavíkur.

Bryggjugatan liggur samsíða höfninni milli miðborgarinnar og Hörpu. Íbúðirnar eru með útsýni yfir Reykjavíkurhöfn og eru við hliðina á fimm stjörnu hóteli, Reykjavik Edition, sem ráðgert er að verði opnað næsta vor.

Um 1,5 milljónir króna á fermetrann

„Kaupendahópurinn er efnaðir einstaklingar. Þeir eru heima og erlendis. Það hefur ekki verið byggt fyrir þennan hóp síðan Skugginn var byggður,“ segir Óskar.

Árið 2015 var sagt frá því í fréttum að dýrustu íbúðir landsins væru í turni í Skuggahverfinu. Þannig var 136 fermetra íbúð við Vatnsstíg 14–16 sett á sölu á 95 milljónir króna, eða yfir 700 þúsund krónur á fermetra. Það er ekki mikið miðað við dýrustu íbúðir landsins fimm árum síðar. Um 1 til 1,6 milljónir króna eru settar á hvern fermetra dýrari íbúðanna við Bryggjugötuna.

Þannig er 181 fermetra íbúð, með tveimur svefnherbergjum, til sölu á 255 milljónir króna. Þrjú baðherbergi eru í íbúðinni, sem skýrist af því að sérbaðherbergi er inn af báðum svefnherbergjum. Þannig eru fleiri baðherbergi en svefnherbergi.

Dýrasta íbúð landsins, svo vitað sé, er hins vegar íbúð 501, á efstu hæð Bryggjugötu 4. Hún er 210 fermetrar að stærð og kostar 345 milljónir króna, rúmlega 1,6 milljónir króna á fermetrann. 

Starfandi húsvörður verður á staðnum. Innréttingar eru frá Ítalíu, sex mismunandi klæðningar eru á húsinu og beinn aðgangur verður í margar íbúðirnar úr lyftu. Óskar segir að byggingarkostnaður sé þrefalt hærri en að jafnaði, vegna staðsetningarinnar, efnisins og frágangsins.

„Það hefur margt breyst frá árinu 2015,“ segir Óskar.

Fasteignamarkaðurinn rís í kreppu

COVID-faraldurinn frestaði því að íbúðir á Bryggjugötu færu á sölu, en engu að síður hefur verið mikið líf á fasteignamarkaði í sumar. 

Í skýrslu Húsnæðis- og mannvirkjastofnunar sem birt var í gær kom fram að sölutími íbúða hefur styst úr 59 dögum í byrjun árs í 43 daga í ágúst. Það er stysti sölutíminn frá því mælingar hófust árið 2013.

Verð íbúða hefur hækkað um 3,9 prósent síðustu 12 mánuði, en sérbýli um 11 prósent. Um 29 prósent íbúða á höfuðborgarsvæðinu seldust á eða yfir ásettu verði í júlí.

Fjöldi lúxusíbúða streymir á markað

Til viðbótar við lúxusíbúðirnar á Bryggjugötu eru til sölu íbúðir á Geirsgötu 17. Þar fæst 170 fermetra íbúð með tveimur svefnherbergjum á 198 milljónir króna.

Íbúðirnar skilast án gólfefna, en með kvarsborðplötum, marmaraflísum á borði og eldhústækjum frá Miele og Liebherr. Hitastigi, lýsingu, gluggatjöldum og sjónvarpi er stýrt með snjallheimiliskerfi.

Samtals er Miklaborg að setja 71 nýjar lúxusíbúð á sölu við Bryggjugötu, Geirsgötu og göngugötuna Reykjastræti. Ekki hefur sambærilegur fjöldi lúxusíbúða komið á markað frá því að Skuggahverfið var í byggingu. Erfitt er að fullyrða endanlega um hæsta söluverð íbúðar á Íslandi, þar sem sumar dýrustu eignirnar fara í sölu án þess að vera auglýstar opinberlega.

Dýrustu íbúðirnar við höfnina eru hins vegar enn ekki komnar í sölu.  Íbúðir á efstu hæðum í nýju fjölbýlishúsunum í miðborginni eru stærri og enn óbirtar. Íbúð 601 á Bryggjugötu 4 er um 350 fermetrar og má því búast við töluvert hærra verði en þeirri sem nú er til sölu á 345 milljónir króna. Kynning á íbúðunum má sjá hér á vef Austurhafnar

Kjósa
0
Hvernig finnst þér þessi grein? Skráðu þig inn til að kjósa.

Athugasemdir

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir.

Mest lesið

Júlía Margrét Alexandersdóttir
2
Það sem ég hef lært

Júlía Margrét Alexandersdóttir

Ekki hlusta á allt sem heil­inn seg­ir þér

Júlía Mar­grét Al­ex­and­ers­dótt­ir hef­ur lif­að með geð­hvörf­um í 15 ár. Hún hef­ur kljáðst við dekksta lit þung­lynd­is og fund­ið fyr­ir und­ur­vellíð­an í man­íu. Í ferl­inu hef­ur Júlía lært að stund­um á hvorki hjart­að né heil­inn at­kvæð­is­rétt. „Stund­um eru það annarra manna heil­ar og annarra manna hjörtu sem vita best.“

Mest lesið

Mest lesið í vikunni

Mest lesið í mánuðinum

Sælukot hagnast um tugi milljóna en starfsfólk og foreldrar lýsa skorti
4
Rannsókn

Sælu­kot hagn­ast um tugi millj­óna en starfs­fólk og for­eldr­ar lýsa skorti

Einka­rekni leik­skól­inn Sælu­kot, sem hef­ur feng­ið millj­arð króna í op­in­ber fram­lög síð­asta ára­tug, hef­ur hagn­ast vel og nýtt pen­ing­ana til að kaupa fast­eign­ir fyr­ir stjórn­ar­for­mann­inn. Stjórn­end­ur leik­skól­ans segja mark­mið­ið vera að ávaxta rekstr­araf­gang, en fyrr­ver­andi starfs­menn og for­eldr­ar nem­enda kvarta und­an langvar­andi skorti. Skól­an­um var ný­lega lok­að tíma­bund­ið vegna óþrifn­að­ar og mein­dýra.
Hollt mataræði lykilatriði að góðri heilsu
6
Fréttir

Hollt mataræði lyk­il­at­riði að góðri heilsu

Ax­el F. Sig­urðs­son, sér­fræð­ing­ur í hjarta­lækn­ing­um, hef­ur skoð­að tengsl fæðu og lífs­stíls við sjúk­dóma, einkum hjarta- og æða­sjúk­dóma. Tal­að hef­ur ver­ið um að lífs­stíls­sjúk­dóm­ar séu stærsta ógn­in við heilsu fólks og heil­brigðis­kerfi til næstu ára­tuga. Ax­el seg­ir að fólk geti breytt miklu með hollu mataræði og hreyf­ingu. Fé­lags­leg tengsl séu líka mik­il­væg. Hann ráð­legg­ur hreina fæðu til að sporna við kvill­um.

Mest lesið í mánuðinum

Nýtt efni

Mest lesið undanfarið ár