Fréttavefur DV fjarlægði frétt af vef sínum föstudaginn 10. júlí eftir að Fréttablaðið tók ákvörðun um að fjarlægja pistil sem lá fréttinni til grundvallar af sínum vef. Ritstjórnir miðlanna, sem báðir eru í eigu Torgs, eru sjálfstæðar samkvæmt reglum þeirra, en ritstjóri DV segist hafa rætt málið við ritstjóra Fréttablaðsins.
Pistillinn birtist á baksíðu Fréttablaðsins á föstudag, en þar fór Guðmundur Brynjólfsson, rithöfundur og djákni, hörðum orðum um Birgi Þórarinsson, þingmann Miðflokksins, án þess þó að nafngreina hann.
„Reyndar er hann ekki svartur, nema á sálinni, en það er ekki honum að þakka,“ skrifaði Guðmundur. „Sá mun gjamma mest á Alþingi og opinberast hans eðla heimska í hvert eitt sinn hann þvælir upp kjaftinum.“ Bætti hann því við að Birgir væri „ætíð skíthæll - nú þingmaður“.
Fréttablaðið fjarlægði pistilinn af vefsvæði sínu á föstudaginn, þrátt fyrir að hafa birt hann í blaðinu um morguninn. Þá fjarlægði DV einnig frétt sína þar sem fjallað var um innihald pistilsins af vefsvæði sínu.
„Pistillinn stóðst ekki þær kröfur sem við gerum til svona efnis,“ segir Jón Þórisson, ritstjóri Fréttablaðsins og aðalritsjóri Torgs. „Það voru bara mistök,“ segir hann um birtingu pistilsins.
Aðspurður um það hvort hann hafi rætt málið við Þorbjörgu Maríónsdóttur, ritstjóra DV, eða blaðamanninn sem skrifaði fréttina segir hann að svo hafi ekki verið. „Það er nú bara ákvörðun sem ritstjóri tekur. Ég legg ekki í vana minn að lýsa samskiptum mínum við samstarfsmenn mína, en í þessu tilfelli var það ekki,“ segir Jón og bætir því við að ritstjórnarlegt sjálfstæði sé í hávegum haft.
Þorbjörg segir hins vegar að hún og Jón hafi rætt málið. Hann hafi hins vegar ekki haft áhrif á ákvörðun hennar.
„Ég og Jón kynntumst í matsalnum hjá Mogganum fyrir nokkrum árum og erum búin að eiga í mjög góðu trúnaðarsambandi löngu áður en ég byrja á DV,“ segir hún. „Og ég á ekki í neinum vandræðum með að segja Jóni hvað mér finnst um eitt né neitt eða segja honum að hann sé fáviti ef mér finnst hann vera fáviti. Það er bara ekkert vandamál. Og alveg öfugt hjá honum. Við tökumst klárlega á og gott betur og svo er það bara búið. Við eigum í það nánum og góðum samskiptum að þann dag sem ég get ekki tekið slaginn við hann þarf ég bara að fara heim.“
„Það voru gerð mistök á Fréttablaðinu. Ég get alveg sagt það upphátt, Jón getur sagt það upphátt“
Hún segir þau ræða málin og aðstoða hvort annað eins og eðlilegt sé með samstarfsmenn. „Ég er fullfær um að taka mínar ákvarðanir sjálf,“ segir hún. „Það voru gerð mistök á Fréttablaðinu. Ég get alveg sagt það upphátt, Jón getur sagt það upphátt. En svo var ákveðið að bregðast við því með eins snyrtilegum hætti og hægt var, sem ég met að sé svona.“
Útgáfufélag Fréttablaðsins, Torg, tilkynnti í desember í fyrra um kaup þess á DV og vefnum DV.is og hafa miðlarnir flutt í sama húsnæði við Hafnartorg eins og sjónvarpsstöðin Hringbraut sem einnig er hluti af samstæðunni.
Í ritstjórnarreglum Torgs segir að ritstjórnir fréttamiðlanna skuli vera sjálfstæðar. „Hlutverk fréttamiðla Torgs er að upplýsa almenning. Ritstjórn þeirra er sjálfstæð og skal starf hennar taka mið af því að aldrei sé efast um trúverðugleika miðla Torgs. Ritstjórnarlegt sjálfstæði skal virt og skal ritstjórnarefni óháð stjórn og eigendum.“
Athugasemdir