Andrés Ingi Jónsson þing­maður spyr hvenær bún­ings­að­stöður og sal­erni muni mæta kröfum nýrra laga sem gera ráð fyrir hlut­lausri skrán­ingu kyns.

Fyr­ir­spurn­inni beinir hann til bæði Ásmundar Einars Daða­sonar, félags- og barna­mála­ráð­herra, og Guð­mundar Inga Guð­brands­sonar, umhverfis- og auð­linda­ráð­herra. „Hvenær má vænta þess að ráð­herra end­ur­skoði lög, reglu­gerðir og reglur á mál­efna­sviði sínu með hlið­sjón af því að ákvæði þeirra um bún­ings­að­stöðu og sal­erni gera ekki ráð fyrir hlut­lausri skrán­ingu kyns, sbr. lög nr. 80/2019, um kyn­rænt sjálf­ræði?“

Lög um kyn­rænt sjálf­ræði tóku gildi síð­asta sumar. Í þeim var skil­greindur réttur fólks til að skil­greina kyn sitt og heim­iluð hlut­laus skrán­ing kyns. „Opin­berum aðilum og einka­að­ilum sem skrá­setja kyn ber að gera ráð fyrir hlut­lausri skrán­ingu kyns, t.d. á skil­ríkjum, eyðu­blöðum og í gagna­söfnum, og skal skrán­ingin táknuð á óyggj­andi hátt,“ segir í lög­unum. „Í vega­bréfum skal ávallt tákna hlut­lausa skrán­ingu kyns með bók­stafnum X.“

Ýmsar reglu­gerðir heyra undir umhverfis- og auð­linda­ráð­herra sem tengj­ast bún­ings­að­stöðum og sal­ernum, meðal ann­ars bygg­ing­ar­reglu­gerð, reglu­gerð um holl­ustu­hætti á sund- og bað­stöðum og reglu­gerð um bað­staði í nátt­úr­unni.