Stundin mun á næstu vikum senda út menningarviðburði í samstarfi við Menningarhúsin í Kópavogi. Viðburðirnir verða haldnir klukkan 13 á mánudögum, miðvikudögum og föstudögum á meðan samkomubanni stendur vegna COVID-19 heimsfaraldursins. Hægt verður að sjá viðburðina á forsíðu Stundarinnar, á Facebook-síðu Stundarinnar og Facebook-síðu Menningarhúsanna í Kópavogi.

Meðal þeirra sem koma fram í viðburðaröðinni eru Sævar Helgi Bragason stjörnufræðingur, Gerður Kristný skáld,  Jógvan, Matti Matt, Vignir Snær, Ragna Fróðadóttir, Andri Snær Magnason rithöfundur, Sigurbjörn Bernharðsson, Halla Oddný, Þorgrímur Þráinsson, Elín Björk Jónasdóttir, Einar Falur, Kordo kvartettinn og Hrönn Egilsdóttir.

Í útsendingu dagsins talar Ragna Fróðadóttir frá New York um textíl, framtíðarsýn og endurvinnslu. Ragna er textílhönnuður og myndlistarmaður og var bæjarlistamaður Kópavogs árið 2019. Útsendingin hefst klukkan 13. Streymi af viðburðinum verður birt í þessari frétt og á fyrrgreindum Facebook-síðum ásamt forsíðu Stundarinnar. Þá verður upptaka tiltæk á sömu stöðum í kjölfarið.

Eftirfarandi er tilkynning frá menningarhúsunum í Kópavogi um viðburðinn:

Kúltúr klukkan 13 | Ragna Fróða

Ragna Fróðadóttir bæjarlistamaður Kópavogs 2019 talar frá NY um textíl, framtíðarsýn og endurvinnslu. Stóð til að Ragna héldi fyrirlestur um efnið í Menningarhúsunum í mars en vegna Covid-19 ástandsins hefur hún verið föst í NY þar sem hún starfar fyrir fyrirtækið Edelkoort Inc. Sem spáir fyrir komandi straumum og stefnum samhliða því að vinna að eigin list og hönnun á vinnustofu sinni í Queens í New York. Sem bæjarlistamaður Kópavogs hefur Ragna unnið að verki með börnum úr 5. bekk Salaskóla og eldri borgurum í Kópavogi. Verkið sem er samsett úr 84 útsaumuðum teikningum í endurunnið efni. Verkið átti að sýna á Barnamenningarhátíð í Kópavogi en verður sýnt við fyrsta tækifæri þegar allir eru komnir á ról aftur.