Stundin mun á næstu vikum senda út menningarviðburði í samstarfi við Menningarhúsin í Kópavogi. Viðburðirnir verða haldnir klukkan 13 á mánudögum, miðvikudögum og föstudögum á meðan samkomubanni stendur vegna COVID-19 heimsfaraldursins. Hægt verður að sjá viðburðina á forsíðu Stundarinnar, á Facebook-síðu Stundarinnar og Facebook-síðu Menningarhúsanna í Kópavogi.

Meðal þeirra sem koma fram í viðburðaröðinni eru Sævar Helgi Bragason stjörnufræðingur, Gerður Kristný skáld,  Jógvan, Matti Matt, Vignir Snær, Ragna Fróðadóttir, Andri Snær Magnason rithöfundur, Sigurbjörn Bernharðsson, Halla Oddný, Þorgrímur Þráinsson, Elín Björk Jónasdóttir, Einar Falur, Kordo kvartettinn og Hrönn Egilsdóttir.

Í dag flytur Kordo kvartettinn Strengjakvartett nr. 2 op. 13 í a-moll eftir Felix Mendelssohn. Til stóð að flytja verkið á Tíbrártónleikum núna í mars en í ljósi aðstæðna mun kvartettinn flytja verkið í Kúltúr klúkkan 13. Streymi af viðburðinum verður birt í þessari frétt og á fyrrgreindum Facebook-síðum ásamt forsíðu Stundarinnar. Þá verður upptaka tiltæk á sömu stöðum í kjölfarið. Útsendingin hefst klukkan 13.

Eftirfarandi er tilkynning frá menningarhúsunum í Kópavogi um viðburðinn:

Kúltúr klukkan 13 | Kordo kvartettinn

Kordo kvartettinn flytur Strengjakvartett nr. 2 op. 13 í a-moll eftir Felix Mendelssohn í Salnum. Til stóð að flytja verkið á Tíbrártónleikum núna í mars en í ljósi aðstæðna mun kvartettinn flytja verkið í Kúltúr klúkkan 13.

Kordo kvartettinn skipa fiðluleikararnir Páll Palomares og Vera Pantich, víóluleikarinn Þórarinn Már Baldursson og sellóleikarinn Hrafnkell Orri Egilsson. Kvartettinn var stofnaður síðla sumars 2018 og flutti sína fyrstu tónleika í febrúar 2019. Tónleikarnir hlutu mikið lof gagnrýnenda sem sögðu hann skipa sér í röð fremstu kammerhópa landsins.

Fiðluleikararnir Vera Panitch og Páll Palomares eru nýráðin í leiðandi stöður við Sinfóníuhljómsveit Íslands, Vera sem annar konsertmeistari og Páll er leiðari annarrar fiðlu.

Páll er einn fremsti fiðluleikari sinnar kynslóðar á Íslandi. Hann hefur hlotið verðlaun í fjölmörgum keppnum á íslenskri jafnt sem erlendri grund og komið fram sem einleikari með fjölda hljómsveita víða í Evrópu.

Vera Panitch er fædd í Danmörku en er af rússneskum og úkraínskum uppruna. Hún hefur unnið til verðlauna í fjölda keppna og lauk nýverið einleikaraprófi frá Konunglega danska tónlistar-háskólanum í Kaupmannahöfn. 

Víóluleikarinn Þórarinn M. Baldursson hefur verið virkur í íslensku tónlistarlífi um árabil. Ásamt því að leika með Sinfóníuhljómsveit Íslands hefur hann spilað með stórum og smáum kammerhópum, s.s. Caput, Kammersveit Reykjavíkur, Elektru og Kúbus. 

Hrafnkell Orri Egilsson sellóleikari hefur verið fastráðinn við Sinfóníuhljómsveit Íslands frá árinu 2002 og leysir nú af sem staðgengill leiðara. Veturinn 2000 - 2001 var Hrafnkell Orri fastráðinn sellóleikari við Fílharmoníusveitina í Lübeck. Auk þess að vera meðlimur í Kammersveit Reykjavíkur leikur hann með hinum ýmsu tónlistarhópum.

Um tónskáldið Felix Mendelssohn:

Þótt Felix Mendelssohn hafi verið aðeins átján ára þegar hann samdi strengjakvartett sinn í a-moll, hafði hann þegar þónokkra reynslu við skrif kammerverka. Eftir hann lágu þegar þrír píanókvartettar, strengjakvintett  og strengjaoktett, auk nokkurra óútgefinna frumæskuverka. Kvartettinn var saminn nokkrum mánuðum eftir lát Beethovens og er undir talsverðum áhrifum síðustu strengjakvartetta hans. Þau verk hlutu blendnar viðtökur í byrjun, og var faðir Mendelssohns meðal þeirra sem þótti lítið til þeirra koma. En Felix sjálfur var stórrhifinn og vísaði ekki aðeins í kvartetta Beethovens í sínum kvartett, heldur tileinkaði sér formbyggingu þeirra og þróaði áfram.

Mendelssohn vitnar í eigið sönglag “Ist es wahr?” og kallast þannig á við titil lokakafla síðasta kvartetts Beethovens, “Muss es sein?” í þessum tilfinningaríka kvartett sem byggir brú á milli klassísks forms og rómantískrar tjáninga