Víðir skammar sóða og varar þjóðina við

Víðir Reyn­is­son, yfir­lög­reglu­þjónn hjá Rík­is­lög­reglu­stjóra, kvað fast að orði á blaða­manna­fundi almanna­varna í dag þegar hann var­aði fólk við því að virða leið­bein­ingar almanna­varna að vettugi. 

„Við höfum fengið tals­vert af til­kynn­ingum um þetta, þar sem menn eru ekki ein­hvern veg­inn alveg búnir að kom­ast í þennan gír. Það er bara mjög mik­il­vægt, það sem við erum að leggja áherslu á, að fólk fari eftir þessu. Við erum ekk­ert að grín­ast með þetta. Þetta er full alvara á bak við þessar tölur. Þess vegna verður fólk að taka þetta alvar­lega,“ sagði Víðir, og stakk fingr­unum takt­fast í borðið til að und­ir­strika mál sitt.

„Þetta er full alvara á bak við þessar tölur“

Fjöldi fyr­ir­tækja hefur farið fram á und­an­þágu við sam­komu­banni, sem bannar að fleiri en 20 manns komi saman hverju sinni. Víðir segir fjölda und­an­þága sýna að ekki ríki nægi­leg sam­staða um að fylgja leið­bein­ingum almanna­varna vegna far­ald­urs­ins.

„Það sýnir í fjölda þeirra und­an­þágu­beiðna sem við erum að fá, að fólk er ekki allt með okkur í þessu. En nú verða bara allir að taka, af hverju erum við að þessu? Ef við horfum á löndin í kringum okkur, þar sem menn eru farnir að fara niður í tvo saman, sem er miklu lengra heldur en við erum að ganga. Nú verðum við bara að taka þessu alvar­lega og fara eftir þessum leið­bein­ingum sem við erum að gefa út.“

Í morgun lést fyrsti Íslend­ing­ur­inn vegna COVID-19. Um var að ræða 71 árs gamla konu frá Hvera­gerði, sem hafði glímt við veik­indi um nokk­urt skeið. Sonur hennar gagn­rýndi þá sem ekki tækju hætt­una af veirunni alvar­lega.

„Þetta er ekki flókið“ 

Víðir sagði ljóst að sam­fé­lagið myndi ekki ganga venju­lega fyrir sig og að sum fyr­ir­tæki myndu ekki geta verið starf­rækt. „Þetta er ekki flókið. Þetta er erfitt. Þetta er mjög snúið fyrir mörg fyr­ir­tæki. Mörg fyr­ir­tæki munu ekki geta starfað. Það er ekk­ert í sam­fé­lag­inu að virka eins og það gerir venju­lega.“ 

Á blaða­manna­fund­inum í dag skamm­aði Víðir jafn­framt fólk fyrir að henda blaut­þurrkum í sal­ernið, sem veldur því að skólp rennur nú óhreinsað út í sjó við Reykja­vík.

„Núna eru allir að sótt­hreinsa hjá sér, þurrka af öllu með blaut­þurrkum, henda þeim í kló­settið, sem hefur verið þess vald­andi að núna erum við að upp­lifa það að það fer óhreinsað skólp í sjó­inn. Hendiði blaut­klút­unum í ruslið, takk fyrir.“