Fyrirtæki sem eiga við tímabundna rekstrarörðugleika að stríða munu geta fengið frestun á allt að þremur greiðslum staðgreiðslu og tryggingagjalds á tímabilinu 1. apríl til 1. desember. Gjalddagi og eindagi greiðslna sem er frestað verður 15. janúar 2021.

Bankaskatturinn verður lækkaður um helming og Seðlabanki Íslands fær heimild til að veita lánastofnunum ábyrgð, án viðtöku trygginga, til að auðvelda þeim að veita viðbótarlán til fyrirtækja í rekstrarörðugleikum og mun ríkissjóður ábyrgjast skaðleysi Seðlabankans af þeirri ráðstöfun. Ríkissjóður mun undirgangast ábyrgðarskuldbindingar vegna samnings við Seðlabankans um fyrirgreiðslu til að auðvelda viðbótarlán fjármálafyrirtækja til fyrirtækja.

Gistináttagjald fellur niður til ársloka 2021 og ekki verður innheimt tollafgreiðslugjald vegna tollafgreiðslu skipa og flugvéla á sama tímabili. Þá verður greiðslum aðflutningsgjalda frestað til að styrkja lausafjárstöðu innflutningsfyrirtækja.

Þetta er á meðal þeirra aðgerða sem ríkisstjórn Íslands leggur til að ráðist verði í til að auðvelda fyrirtækjum að bregðast við áhrifum COVID-19 faraldursins á Íslandi. Blaðamannafundur stendur nú yfir í Hörpu þar sem aðgerðirnar eru kynntar.

Mynd: Úr kynningu ríkisstjórnarinnar

Barnafjölskyldur fá aðstoð í formi sérstaks barnabótaauka árið 2020, 40 þúsund með hverju barni fyrir lágtekjufólk og 20 þúsund fyrir heimili þar sem tekjuhærri aðilinn hefur tekjur yfir 11.125.045 krónum. Þá verða almenningi veitt stafræn gjafabréf til að ferðast innanlands þegar faraldurinn hefur gengið yfir.

Þá verður einstaklingum með séreignarsparnað gert kleift að taka út allt að 12 milljónir króna með jöfnum mánaðarlegum greiðslum næstu mánuði. Sveitarfélög fá auknar heimildir til skuldasöfnunar og gjaldendum fasteignaskatta verður heimilt að óska eftir frestun á allt að þremur greiðslum til og með 1. desember 2020. Umsvifamiklum innviðafjárfestingum verður flýtt og ráðist í aðgerðir til að auka nýsköpun. Endurgreiðslur vegna viðhaldsvinnu við heimili og frístundahúsnæði verða hækkaðar úr 60% í 100%, úrræðið útvíkkað til heimilisþjónustu og tekin upp ný heimild fyrir þriðja geirann svokallaða, sem nær m.a. til almannaheilla- og íþróttafélaga, til endurgreiðslu virðisaukaskatts vegna vinnu fólks við byggingaframkvæmdir á þeirra vegum. 

Hér má lesa kynningarefni stjórnarráðsins um aðgerðirnar.