Samkomubanni verður  komið á frá 15. mars til 12. apríl til að hægja á útbreiðslu Covid-19 veirunnar.  Þetta kom fram á blaðamannafundi, sem Svandís Svavarsdóttir heilbrigðisráðherra boðaði til í Ráðherrabústaðnum klukkan 11 í morgun.

„Við erum á fordæmalausum tímum sem kalla á fordæmalausar aðgerðir,“  sagði Katrín Jakobsdóttir forsætisráðherra. „Þau tímamót hafa orðið að sóttvarnalæknir hefur sent heilbrigðisráðherra tillögu um samkomubann. Þetta er í fyrsta skiptið í lýðveldissögunni,“ sagði Katrín. Hún sagðist fullviss um að samfélagið gæti tekist vel á við þetta.

Svandís sagði að bannið  væri samkvæmt lögum um sóttvarnir og verið væri að virkja heimildir sóttvarnalaga.  „Það sem um ræðir er samkomubann,“ sagði hún. Bannið myndi ekki eiga við um Leifsstöð.

Framhaldsskólum og háskólum lokað

Þórólfur Guðnason sóttvarnalæknir og Svandís Svavarsdóttir heilbrigðisráðherraSamkomur þar sem 100 manns eða fleiri koma saman verða takmarkaðar í fjórar vikur frá miðnætti 15. mars. Þetta þýðir að bannið mun vara til 12. apríl, sem er páskadagur.

Mynd: Heiða Helgadóttir

Í þessu felst, sagði Svandís, að samkomur þar sem 100 manns eða fleiri koma saman verða takmarkaðar í fjórar vikur  frá miðnætti 15. mars.  Þetta þýðir að bannið mun vara til 12. apríl, sem er páskadagur. Að auki verður gerð sú krafa að þar sem fólk komi saman verði minnst tveir metrar milli fólks. 

Að auki verður skólum á háskóla- og framhaldsskólastigi lokað yfir sama tímabil. Lilja Alfreðsdóttir mennta- og menningarmálaráðherra, sagði að takmarkanir yrðu settar í grunn- og leikskólum.  Þær myndu felast í því að börn yrðu í eins litlum hópum og kostur væri á. „Þetta er útfærsla sem við hrindum í framkvæmd strax eftir hádegi í samráði við sveitarfélögin,“ sagði Lilja.

„Samkomur þar sem 100 manns eða fleiri koma saman verða takmarkaðar í fjórar vikur  frá miðnætti 15. mars“

Lögreglumenn verða ekki við stofnanir og verslanir

Á fundinum var spurt um hvort þetta ætti við um líkamsræktarstöðvar og fleiri slíka staði og hvort talið yrði þar inn og hvernig það yrði framkvæmt. Forsætisráðherra svaraði því til að lögreglumenn yrðu ekki við allar stofnanir og verslanir. Treysta yrði almenningi til að fylgja þessum tilmælum.

Á blaðamannafundiForsætisráðherra sagði að lögreglumenn yrðu ekki við allar stofnanir og verslanir til að gæta þess að þar væru ekki fleiri en 100 manns. Treysta yrði almenningi til að fylgja tilmælum.

Mynd: Heiða Helgadóttir

Heilbrigðisráðherra sagði að heilbrigðiskerfið væri líklega vel undirbúið fyrir það sem framundan væri. Ekkert heilbrigðiskerfi í heiminum réði við aðstæður ef allt færi á versta veg.

„Að lokum vil ég minna á að þessar aðgerðir miða að því að draga úr faraldrinum eins og kostur er,“ sagði Þórólfur Guðnason sóttvarnalæknir. „ Við verndum innviðina og verndum getu heilbrigðiskerfisins til að takast á við þetta.“

„Þórólfur Guðnason: Þessar aðgerðir miða að því að draga úr faraldrinum eins og kostur er“

Samkvæmt vefsíðu Embættis landlæknis og almannavarnardeildar ríkislögreglustjóra, þar sem birtar eru upplýsingar um útbreiðslu Covid-19 veirunnar, eru nú 126 staðfest smit hér á landi, 919 eru í sóttkví og 126 í einangrun. 1.188 sýni hafa verið tekin.

Á fundi„Við erum á fordæmalausum tímum sem kalla á fordæmalausar aðgerðir,“ sagði Katrín Jakobsdóttir forsætisráðherra.

Mynd: Heiða Helgadóttir

Langan veg frá því að ná yfirhöndinni

Páll Matthíasson, forstjóri Landspítala, segir í forstjórapistli á vefsíðu spítalans að sú farsótt, sem nú sé glímt við, reyni á. „Við erum langan veg frá því að ná yfirhöndinni í baráttunni við þennan vágest. Það mun hins vegar takast. Landspítali gegnir sérstöku og mikilvægu hlutverki í því verkefni að tryggja sem minnstan skaða vegna Covid-19 veikinnar. Það ræðst annars vegar af þjónustuhlutverki okkar, þeirri staðreynd að við höfum það starfsfólk og þá aðstöðu sem grípa þarf til þegar allt þrýtur. Hins vegar þá er Landspítali háskólasjúkrahús landsins og okkar starfsfólk þarf að beita þekkingu sinni og reynslu til að finna bestu leiðir til sigurs,“ skrifar Páll.

„Skiljanlega er fólk áhyggjufullt. Staðan er fordæmalaus, nýjar upplýsingar berast daglega og enginn getur haldið því fram að hafa öll svörin. Við þessar aðstæður þarf að samhæfa þá þekkingu sem fyrir liggur um veiruna, smitleiðir, þá sem sýktir eru og ástand þeirra. Á sama tíma þarf að huga að getu sjúkrahússins, tækjum, einangrunaraðstöðu og síðast en ekki síst vinnufærni starfsfólks á tímum sóttkvíar og mögulegrar sýkingar. Þetta kallar á hraða ákvarðanatöku.“

Fréttin hefur verið uppfærð