Íslandsbanki bauð hæst í eignir Björns Inga Hrafnssonar, ritstjóra Viljans, á nauðungaruppboði á dögunum. Hefur hann lengdan frest til að semja við kröfuhafa áður en salan gengur í gegn. Eignir félags hans á Suðurlandi hafa einnig verið boðnar upp.
Uppboð á fjórum eignum Björns Inga að Másstöðum í Hvalfjarðarsveit fór fram 16. janúar síðastliðinn og voru gerðarbeiðendur ríkisskattstjóri, Hvalfjarðarsveit, Vátryggingafélag Íslands, sýslumaðurinn á Vesturlandi, Landsbankinn og Íslandsbanki. Samið var um átta vikna frest að loknu uppboðinu. Björn Ingi hefur þann tíma til að semja við gerðarbeiðendur, en að þeim fresti liðnum getur Íslandsbanki greitt 25 prósent kaupverðsins og fengið umráð yfir eignunum.
Sýslumaðurinn á höfuðborgarsvæðinu gerði fjárnám í eignunum í nóvember fyrir hönd Íslandsbanka. Varðaði málið þá 2,7 milljón króna kröfu bankans.
Foreldrar Björns Inga eru skráð til húsa á Másstöðum og seldu honum eignirnar fjórar í apríl 2015. Umsamið kaupverð voru 95,2 milljónir króna og greiddist það með yfirtöku áhvílandi skulda, greiðslum og búseturétti foreldranna. Greiða foreldrarnir 200 þúsund krónur í mánaðarlega leigu sem ráðstafast til greiðslu hluta kaupverðsins sem nemur um 25 milljónum króna.
Þá voru tvær eignir félags Björns Inga á Suðurlandi seldar í gær á nauðungaruppboði. Eignirnar eru tvær sumarbústaðajarðir við Óðinsstíg í Grímsnesi í eigu félagsins Kringluturninn ehf. sem Björn Ingi á til helmings við viðskiptafélaga sinn Arnar Ægisson. Var hvor jörðin fyrir sig seld á 220 þúsund krónur til félagsins Ferðahúsið ehf. Gerðabeiðandi var Grímsnes- og Grafningshreppur. Hefur Kringluturninn tveggja vikna frest til samninga. Félagið hefur ekki skilað ársreikningi frá 2015.
Vildi ekki fréttaflutning af málunum
Stundin hefur áður fjallað um fjármál Björns Inga eftir að fjölmiðlafyrirtæki hans, meðal annars Pressan og DV, urðu gjaldþrota. Skattrannsókn vegna gruns um meiri háttar skattalagabrot Björns Inga lauk í febrúar á síðasta ári og taldi skattrannsóknarstjóri ekki tilefni til að aðhafast frekar í málinu. Rannsóknin tengdist millifærslum frá fjölmiðlafyrirtækjum hans á hans eigin reikninga. Lögmaður Björns Inga sagði liggja í augum uppi að farið yrði í mál við ríkið og bóta krafist.
Í ágúst gagnrýndi Björn Ingi fréttaflutning Stundarinnar af málinu á Facebook og sagði að fjárhagsvandræði hans undanfarin ár hafi fyrst og fremst stafað af skattrannsókninni og kyrrsetningu eigna vegna hennar. „Nú þegar umræddri kyrrsetningu hefur verið aflétt og skattrannsókn á mig felld niður og ég hreinsaður af öllum ásökunum, hefur tekið við ferli við að vinda ofan af þeim erfiðleikum sem af þessu sköpuðust. Það er viðamikið verkefni og tímafrekt. Ganga þarf til samninga við lánadrottna, semja um skuldir og gera áætlanir miðað við breyttar forsendur. Krafa um nauðungaruppboð, sem Stundin hefur sagt frá, kemur að langmestu leyti til af áætlunum á mig en ekki raunverulegri skuld og eru þau mál nú í kærumeðferð. Ætti leiðrétt niðurstaða úr þeim málum að liggja fyrir á næstu vikum,“ skrifaði hann í ágúst.
Athugasemdir