Símtal Jóhannesar Stefánssonar uppljóstrara við fyrrverandi eiginkonu hans, þar sem hann hótar henni og öðrum öllu illu, hefur verið birt á Youtube á nafnlausum aðgangi.

Fyrrverandi eiginkona Jóhannesar, sem tók upp samtalið, segir við Stundina að hún hafi ekki birt myndbandið og enginn á hennar vegum. Hún tók myndbandið árið 2017. Jóhannes hafi beðist afsökunar á framkomu sinni og reynt að bæta henni það upp. Hún sé ekki ósátt við Jóhannes í dag.

Hún hafi hins vegar deilt myndbandinu með Jóni Óttari Ólafssyni, starfsmanni Samherja, árið 2017, og nokkrum öðrum.

Jóhannes segir í samtali við Stundina að hann hafi verið ölvaður og örvinglaður þegar hann hringdi í eiginkonu sína.

„Á þessu tímabili upplifði ég mig í mikilli lífshættu. Ég var örvinglaður og tókst á við aðstæðurnar með því að drekka áfengi. Ég sagði hluti sem ég hef ætíð séð eftir og hef gengist við því og beðið alla hlutaðeigandi aðila afsökunar,“ segir Jóhannes.

„Ég sagði hluti sem ég hef ætíð séð eftir og hef gengist við því og beðið alla hlutaðeigandi aðila afsökunar“

Fyrrverandi eiginkona hans vildi ekki koma fram undir nafni, þar sem hún vildi ekki vera aðili að Samherjamálinu.

Jóhannes Stefánsson steig fram um miðjan nóvember og greindi frá mútugreiðslum og stórfelldum aflandsviðskiptum Samherja í Afríku. Hann var framkvæmdastjóri dótturfélags Samherja í Namibíu og kaus að afhjúpa starfsemina með því að afhenda gögn um tölvupósta og millifærslur til Wikileaks. Stundin hefur fjallað um málið í samstarfi við Wikileaks, Ríkisútvarpið, Al Jazeera og namibíska dagblaðið Namibian.