Heiða Helgadóttir ljósmyndari fékk í dag fern af átta verðlaunum Blaðaljósmyndarafélags Íslands fyrir ljósmyndir sínar í Stundinni. Ingibjörg Dögg Kjartansdóttir, ritstjóri Stundarinnar, fékk blaðamannaverðlaun Íslands í flokknum Viðtal ársins, fyrir grein sína um Kristínu Gerðu Guðmundsdóttur, Engillinn sem villtist af leið.
Þá fékk Kristinn Magnússon ljósmyndari verðlaun fyrir portrettmynd sína af Guðna Th. Jóhannessyni, sem tekin var í viðtalaröð Stundarinnar við forsetaframbjóðendur.
Heiða Helgadóttir fékk verðlaun í flokknunum mynd ársins, fréttamynd ársins, myndaröð ársins og daglegt líf mynd ársins. Þetta er annað árið í röð sem fréttaljósmynd ársins er úr Stundinni, sem og myndaröð ársins og daglegt líf mynd ársins.
Fréttamynd ársins var tekin fyrir frétt Stundarinnar þegar hælisleitendur voru dregnir út úr Laugarneskirkju af lögreglu í júní í fyrra. Þá var verðlaunamyndin í flokknum daglegt líf tekin fyrir umfjöllun Stundarinnar um undirbúning fyrir keppni í módelfitness. Myndaröð ársins var tekin fyrir Stundina vegna greinar um Íranann Morteza Zadeh, sem beið brottvísunar til Írans, þar sem hann hafði verið dæmdur til dauða fyrir að taka upp kristna trú.
„Nærgætni og fagmennska“
Þetta er í fimmta sinn sem Ingibjörg Dögg fær tilnefningu til blaðamannaverðlauna og í annað skiptið sem hún hreppir þau. Í rökstuðningi dómnefndar um viðtal ársins segir: „Viðmælandinn, Berglind Ósk Guðmundsdóttir, rekur örlög systur sinnar, Kristínar Gerðar, sem svipti sig lífi eftir langa og harða baráttu við eiturlyfjafíkn og geðsjúkdóma. Í kjölfar misnotkunar í æsku leiddist Kristín Gerður út í vændi og árum saman glímdi hún við afleiðingar þess; yfirþyrmandi angist, vonleysi og hræðslu. Ingibjörg Dögg nálgast vandmeðfarinn efnivið af nærgætni og fagmennsku. Hún nær góðu sambandi við viðmælanda sinn og dýpkar frásögnina með heimildavinnu. Þannig styðst Ingibjörg Dögg meðal annars við dagbókarfærslur hinnar látnu systur og nafnlaus viðtöl sem Kristín Gerður veitti í lifanda lífi. Engillinn sem villtist af leið er áminning um hversu erfitt það er að komast út úr svo erfiðum aðstæðum, hve litla aðstoð er að fá og hvernig kerfið brást Kristínu Gerði á ögurstundu.“
Jóhannes Kr. blaðamaður ársins
Brúneggjamálið, sem Tryggvi Aðalbjörnsson opnaði í Kastljósinu, fékk verðlaun fyrir rannsóknarblaðamennsku ársins. Dómnefndin sagði málið „eitt stærsta neytenda- og dýravelferðarmál undanfarinna ára“.
Sigrún Ósk Kristjánsdóttir á Stöð 2 fékk verðlaun fyrir umfjöllun ársins, þáttaröðina Leitin að upprunanum, þar sem Sigrún „uppfyllti ósk þriggja ættleiddra kvenna um að hitta líffræðilegar mæður sínar“.
Í flokknum Blaðamannaverðlaun ársins 2016 fékk Jóhannes Kr. Kristjánsson verðlaunin fyrir sinn hlut í úrvinnslu og birtingu Panama-skjalanna, en birting frétta úr upplýsingum skjalanna var í samstarfi við Aðalstein Kjartansson, Kastljósið, Stundina, Kjarnann og Fréttatímann.
Athugasemdir