Uppsala Ásmundar Einars var til umræða á Alþingi rétt í þessu þegar rætt var um fundarstjórn. Bæði Sigmundur Davíð Gunnlaugsson forsætisráðherra og Jón Gunnarsson tóku til máls og gagnrýndu Birgittu Jónsdóttur fyrir að ræða við fjölmiðla, nánar tiltekið Vísi, vegna meintra veikinda Ásmundar Einars.

„Hér eru menn auk þess farnir að brjóta ýmsar og flestar umgengnisvenjur sem tíðkast hafa hér á þinginu, svo ekki sé minnst á almenna kurteisi. Getur virðulegur forseti haft stjórn á fundi. Það má öllum vera ljóst í hvers konar óefni er komið þegar þingmaður er farinn að tjá sig við fjölmiðla um það hversu oft eða hvort annar þingmaður hafi farið á salernið á ferðalagi. Þegar þessi stað er komin upp á þingi og í umræðum við fjölmiðla þá má öllum vera ljóst hvers konar óásætanleg niðurstaða er orðin í þessum leikaraskap,“ sagði Sigmundur Davíð á þingi.

Því næst tók Jón Gunnarsson, þingmaður Sjálfstæðisflokksins, til máls og tók hann undir með forsætisráðherra. Birgitta sagði í samtali við Vísi í gær að Ásmundur hafi verið með bestu heilsu og hafi verið að grínast með sessunaut sínum Jóni Gunnarssyni.„Virðulegur forseti, það er fullt tilefni til að hafa orð á því hér hvernig þingmenn eru farnir að blogga hér persónulega. Það tekur steininn úr þegar háttvirtur þingmaður, Birgitta Jónsdóttir, er hér á bloggi að fjalla um persónuleg samtöl mín og annars þingmanns, sem eru sessunautar hennar í þingsal. Þetta er ítrekað og hefur áður gerst í vetur, að hún setur inn á Facebook persónulegar upplýsingar persónuleg samtöl okkar. Þetta er algjör nýlunda hér í þessu,“ sagði Jón.