Guðjón S. Brjánsson, nýkjörinn þingmaður Samfylkingarinnar og fyrrverandi forstjóri Heilbrigðisstofnunar Vesturlands, hefur áhyggjur af umræðunni um fjárþörf Landspítalans og óttast að neikvæð orðræða reyni mjög á heilbrigðisstarfsfólk. Þetta kom fram í viðtali við hann á Bylgjunni í morgun.

Stjórnendur Landspítalans hafa ítrekað fullyrt undanfarnar vikur að þörf sé á verulegri aukningu fjármuna til að unnt sé að sinna nauðsynlegri þjónustu. Í pistli eftir Pál Matthíasson, forstjóra Landspítalans, sem birtist í síðustu viku er fullyrt að verði fyrirliggjandi fjárlagafrumvarp samþykkt óbreytt muni það hafa mjög alvarlegar afleiðingarnar fyrir stóran hóp sjúklinga og aðstandendur þeirra. Ekki verði komist hjá uppsögnum, lokunum deilda og annarri skerðingu á þjónustu sjúkrahússins. 

Þegar Guðjón var spurður hvað honum þætti um umræðuna um heilbrigðismálin í morgun sagði hann: „Þetta er algjörlega óviðunandi umræða og hvernig mál eru raunar sett fram, bæði gagnvart þeim sem þarna starfa og stjórnvöldum og öllum sem vinna í heilbrigðisþjónustu. Við þurfum að vinda ofan af þessari orðræðu. Hún er til vansa.“

Þá sagði hann umræðuna hundleiðinlega; um væri að ræða „árvissan faraldur“ sem gengi í fjölmiðlum og snéri að Landspítalanum. „Að þeir finni sig knúna til þess að fara í þennan leiðangur á hverju einasta ári gagnvart stjórnmálamönnum, til þess að knýja fram aukið fé til rekstrar, það er algjörlega óásættanlegt. Og af hverju gerist þetta? Ég held að mikilvægasta atriðið sé – og á það var bent í McKinsey-skýrslunni – að það vantar stefnumótun í heilbrigðisþjónustu og það vantar stefnumótun fyrir Landspítalann.“

„Vara við því að orð séu toguð til til að reyna
að búa til ágreining þar sem fólk er í hjarta
sínu sammála“

Eyjan birti frétt um ummæli Guðjóns í morgun og vitnaði orðrétt í hann. Í kjölfarið hefur Guðjón kvartað undan því að snúið sé út úr orðum hans og þau mistúlkuð. „Vegna túlkana á orðum mínum í útvarpsviðtali í morgun, vil ég segja alveg skýrt, að við í þingflokki Samfylkingarinar erum einhuga í baráttu okkar fyrir því að auka verulega fé til heilbrigðismála - þar með talið Landspítalans - á fjárlögum næsta árs,“ skrifar hann og bætir við: „Sem starfsmaður heilbrigðiskerfisins um árabil myndi ég gjarnan kjósa að umræða um heilbrigðismál og fjármögnun þess, forgangsröðun og stefnumótum, væri ítarlegri en við sjáum þessa dagana og vara við því að orð séu toguð til til að reyna að búa til ágreining þar sem fólk er í hjarta sínu sammála.“ Þá segist hann hafa rætt við ritstjóra Eyjunnar og „óskað eftir að útúrsnúin fyrirsögn verði efnislega lagfærð“.

Á meðal þeirra sem gagnrýna Guðjón er Steinunn Valdís Óskarsdóttir, fyrrverandi borgarstjóri og þingkona Samfylkingarinnar. „Ég hlustaði tvisvar á viðtalið og það verður ekki misskilið eða túlkað öðruvísi en sögð orð. Ég geri þá kröfu á þingmenn að þeir þurfi ekki að vera með eftiráskýringar um hvað þeir meintu í viðtölum og hvað ekki,“ skrifar hún. Þá birti Kvennablaðið harðorðan pistil um málið og setur ummæli Guðjóns í samhengi við loforð Samfylkingarinnar um besta heilbrigðiskerfi í heimi.

Magnús Karl Magnússon, prófessor og forseti læknadeildar, furðar sig einnig á málflutningi Guðjóns og spyr hvort sjónarmið hans samræmist stefnu Samfylkingarinnar. „Þriðjungur þingmanna flokksins finnst óboðlegur málflutningur starfsmanna LSH. Eru það kannski ýkjur að það þurfi endurreisn heilbrigðiskerfisins?“ skrifar Magnús á Facebook.

„Að gera orðræðu starfsmanna LSH sem eru mjög langþreyttir á endalausum sparnaði að umræðuefni er móðgun við almenning. Upphaf viðtalsins í morgun var þess eðlis að þingmaður Samfylkingar telji umræðuna vandamálið. Það vantar 50-70 milljarða (jafnvel nærri 100 milljarða) í kerfið. Fjárlagafrumvarpið er móðgun við vilja fólks. Þingmenn verða að gera svo vel að tala skýrt.“