Forseti lýðveldisins, Ólafur Ragnar Grímsson, sá sér ekki fært að mæta á hátíðarhöld sem haldin voru í gær á Arnarhóli í tilefni þess að 35 ár eru liðin síðan Vigdís Finnbogadóttir var kjörin forseti.

Árni Sigurjónsson skrifstofustjóri hjá embættinu segir að ástæða þess sé að Ólafur Ragnar sé staddur í London þar sem hann hafi meðal annars setið fund til heiðurs stjórn Goldman Sachs bankans.

„Forseti situr kvöldverð í London sem Lakshmi Mittal, forstjóri ArcelorMittal, heldur til heiðurs stjórn Goldman Sachs bankans. Þar var m.a. rætt um glímuna við fjármálakreppuna, árangur Íslendinga og ákvarðanir varðandi fjármagnshöftin,“ segir á heimsíðu forsetaembættisins. 

Bæði Mittal og Goldman Sachs er þó hvergi nærri óumdeildir og hefur Mittal meðal annars verið sakaður af sínum fyrrverandi starfsmönnum um þrælahald.

„Það var ekki þannig að það væri verið að bjóða einhverjum sérstökum stjórnmálamönnum“

Auður Hauksdóttir, forstöðumaður Stofnunar Vigdísar Finnbogadóttur í erlendum tungumálum, segir í samtali við Stundina að engum stjórnmálamönnum hafi verið formlega boðið á hátíðarhöldin.

Umdeildur auðmaður

Mittal er meðal ríkustu manna heims og situr hann sjálfur í stjórn Goldman Sachs bankans. Árið 2011 var hann sjötti ríkasti maður heims samkvæmt tímaritinu Forbes. Á nýjasta lista tímaritsins hefur Mittal þó fallið niður í 82. sæti yfir ríkustu menn heims.

Árið 2007 sökuðu námumenn í Kasakstan Mittal um að græða á þrælahaldi í kjölfar fjölda dauðsfalla í námum í hans eigu. Námumennirnir sögðu að rekja mætti 90 dauðsföll yfir fjögura ára tímabili til sparnaðaraðgerða fyrirtækisins. Höfðu þeir orð á því að aðstæður væru verri í námum Mittals en í námum Sovíetríkjanna.

Gerandi hruninu

Bankinn sem Ólafur Ragnar sat kvöldverð til að heiðra er síst minna umdeildur og er jafnvel nefndur sem einn helsti gerandi í fjármálakreppunni árið 2008. „Það ætti að velta Goldman upp úr tjöru og fiðri vegna 2008 hrunsins,“ segir til að mynda í frétt Forbes frá árinu 2011.

Bankinn kemur víða við sem gerandi í orsökum efnahagskreppunnar síðastliðin ár. Bankinn var lykilaðili í undirmálslánakreppunni og græddi á hruninu með því að taka sér skortstöðu gagnvart því. Bankinn hjálpaði Grikkjum að fela halla ríkissjóðs. Þrátt fyrir allt hefur bankinn haldið velli og er jafnvel í betri stöðu en fyrir hrun. 

Engum stjórnmálamönnum formlega boðið

Auður Hauksdóttir, forstöðumaður Stofnunnar Vigdísar Finnbogadóttur í erlendum tungumálum, segir að Ólafi Ragnari hafi ekki verið formlega boðið á hátíðarhöldin. Hún segir að engum ráðamanni hafi verið boðið á hátíðarhöldin heldur þjóðinni í heild sinni. „Það var engum boðið. Áhersluatriði hjá okkur var að þetta væri fyrir alla Íslendinga. Þetta væri bæði fyrir stjórn og stjórnarandstöðu, allt þingið. Það var ekki þannig að það væri verið að bjóða einhverjum sérstökum stjórnmálamönnum, eins og þú sást þá vorum bara fulltrúar stofnunarinnar og fjölskyldan hennar Vigdísar og forseti Alþingis á pallinum, engir pólitískusar,“ segir Auður.