„Mér leið eins og ég væri fastur í hel­víti,“ segir maður sem neytti nýs fíkni­efnis sem nú er komið til lands­ins.

Um er að ræða verk­smiðju­fram­leitt fíkni­efni sem heitir 2C-B. Það er boðið til sölu í lok­uðum íslenskum sölu­hópum á sam­fé­lags­miðl­inum Facebook. Efnið er örvandi, veldur miklum ofskynj­unum og getur sett neyt­anda þess í lífs­hættu með ýmsum hætti. Efnið sjálft er ekki nýtt þar sem það var fundið upp af efna­fræð­ingnum Alex­ander Theodore Shulgin árið 1974 en hann hefur oft verið kall­aður guð­faðir e-töfl­unnar. Fíkni­efnið er hins vegar nýtt á mark­aði hér en það fór fyrst að bera á því á síð­asta ári.

Samkvæmt heim­ildum Stund­ar­innar kom efnið þó ekki í það miklu magni á síð­asta ári að hægt væri að selja það í fíkni­efna­sölu­hópum á sam­fé­lags­miðlum. Í ár hins vegar kom stór send­ing af efn­inu hingað til lands og hefur neysla þess farið vax­andi und­an­farnar vikur og mán­uði.