Norski sjóherinn greinir frá því á Facebook-síðu sinni að íslensku togararnir Þerney og Kleifaberg hafi báðir verið stöðvaðir við ólöglegar veiðar í norskri landhelgi. Samkvæmt stöðufærslu sjóhersins hafði Þerney stundað veiðar á ýsu yfir nokkra daga en það er óheimilt.

Norska varðskipið KV Sortland hugðist því draga Þerney til Tromsø en málið var afgreitt með greiðslu sektar áður en til þess kom. Samkvæmt færslu norska sjóhersins hljóðaði sektin upp á 850 þúsund norskar krónur sem samsvarar ríflega 12 milljónum íslenskra króna. Þerney fékk í kjölfarið að halda áfram veiðum á þorski við Vestur-Finnmörk.

Facebook-færsla hersins hefur vakið töluverða athygli. Einn þeirra sem tjáir sig um málið í athugasemd er Bjørn Brevik. Hann hneykslast á því hve lág sektin sé og segir það greinilegt að það borgi sig að brjóta lögin.

Þerney er í eigu HB Granda en útgerðin hagnaðist um 6,5 milljarða króna á síðasta ári.

Norska varðskipið KV Sortland þurfti sömuleiðis að hafa afskipti af Kleifabergi RE-070 en líkt og Þerney hafi togarinn stundað ólöglegar veiðar á ýsu. Íslenskir togarar mega einungis nýta ýsu sem meðafla innan norskar lögsögu. Kleifaberg er í eigu Brim. Kleifaberg fékk þó lægri sekt en Þerney, en Brim þarf að borga um sex milljónir króna í sekt, sem var greidd á staðnum. Samkvæmt stöðufærslu norska hersins komst upp um lögbrot íslensku útgerðanna við reglubundið eftirlit. Í athugasemdum við færslu sjóhersins birtast viðhorf Norðmanna í sjávarútvegi til ólöglegra veiða Íslendinga. „Þetta er hópur bandíta,“ skrifar Norðmaðurinn Stein Morten Berdal í athugasemd við stöðufærslu sjóhersins um Kleifaberg.