„Fóstureyðing er aldrei, né getur verið, einkamál konu. Enda verður barn ekki getið nema með aðkomu karlmanns. Konur verða að axla ábyrgð á eigin kynlífi alveg eins og karlmenn!“ skrifar Jakob Ingi Jakobsson lögfræðingur í aðsendri grein í Fréttablaðið í dag. Jakob Ingi segir meðal annars afstöðu karla sniðgengna í umfræðu fjölmiðla um fóstureyðingar, sem sé einhliða og femínísk. 

Í Fréttablaðinu er Jakob Ingi sagður mannréttindalögfræðingur en samkvæmt upplýsingum á lögfræðistofu hans er hann sérmenntaður í markaðs- og útflutningsfræðum, verðbréfarétti og fjármögnun hraðvaxandi einkafyrirtækja. 

„Það þarf að gæta að réttindum feðranna og barnanna sjálfra, en ekki einblína eingöngu á skoðanir kvennanna sem vilja ekki fæða né ala upp börnin sem þær hafa þó getið! Þessar konur virðast þó vera einráðar og geta sniðgengið rétt annarra,“ skrifar Jakob Ingi  meðal annars. Þá segir hann það rétt föður að fá að ala barnið upp einn eftir fæðingu ef hann vill. „Þá þarf hafa í huga rétt barnsins sjálfs til lífs. Einnig þarf að skoða siðferðislegu hliðina á þessu gagnvart feðrum og barni! Það má ekki einblína á hlið konunnar.“

Jakob Ingi gefur lítið fyrir rök um að konur eigi að hafa yfirráðarrétt yfir eigin líkama. „Það er rétt að undirstrika það að kona hefur vald yfir eigin líkama þó henni sé gert að axla ábyrgð og afleiðingar á eigin kynlífi!“ skrifar hann. Þá varar hann við öfgafullum femínisma. „Gleymum ekki heimssögunni og afleiðingum öfgafullra „isma“ – stefna er leitt hafa til mikils óréttar eins og fasisma, rasisma og nasisma. Konur verða að gæta hófs í baráttu sinni. Því skerðing á umgengni og svona einhliða ákvarðanir eru til þess fallnar að skerða rétt og vinna gegn hagsmunum ekki bara karla, heldur framtíð barnanna sjálfra!“

Margar upplifa þvingun og þrýsting frá karlmönnum

Silja Bára Ómarsdóttir og Steinunn Rögnvaldsdóttir gáfu nýlega út bók sem segir frá reynslu kvenna af fóstureyðingum. Þær segja umræðu um ábyrgð mjög einhliða og beinast að þeim konum sem verða óvænt þungaðar. „Skilaboðin eru að þær hefðu átt að passa sig betur og sýna meiri ábyrgð. Þannig er skautað fram hjá ábyrgð karlmanna í þessu samhengi,“ skrifa þær meðal annars í grein á Stundinni. „Margar konur sem segja sögu sína í bókinni lýsa miklum stuðningi af hálfu karlmannanna í lífi þeirra. Aðrar hafa reynslu af þvingun og þrýstingi. Erlendar rannsóknir sýna að á milli 6-22% kvenna sem fara í fóstureyðingu upplifa ofbeldi af hálfu maka. Í bókinni okkar lýsa nokkrar konur reynslu sinni af því hvernig ofbeldi af hálfu maka hafði áhrif á ákvörðun þeirra um að fara í fóstureyðingu.“

Sjá einnig: Dagbók um fóstureyðinguna: Finn enn fyrir eftirköstunum