Frá árinu 1981 hefur Norð­mað­ur­inn dr. Mads Gilbert sýnt Palest­ínu­mönnum sam­stöðu með bæði lækn­is­að­stoð og rödd sinni. Hann er póli­tískur læknir, óhræddur við að for­dæma aðgerðir Ísra­els­hers í Palest­ínu og rétt­læta mót­spyrnu Palest­ínu­manna. „Ég er með líf­inu í liði,“ segir hann. 

Mads hefur staðið vakt­ina á al-Shifa spít­al­anum á Gaza frá árinu 2006 en á þeim tíma hefur Ísra­els­her gert alls fjórar inn­rásir á svæðið. Líkt og Mads bendir á hefur átta ára barn á Gaza nú upp­lifað fjögur, blóðug stríð og horft upp á hluti sem ekk­ert barn ætti að þurfa að lifa. Í dag, 8. júlí, er eitt ár liðið frá síð­ustu inn­rás Ísra­els­hers en hún stóð yfir í 51 dag og leiddi yfir 2200 Palest­ínu­manna til dauða, þar af 551 barn. Mads er nú staddur hér á landi að kynna nýj­ustu bók sína, Nótt í Gaza, sem kom nýverið út í enskri þýð­ingu. Í bók­inni segir hann frá upp­lifun sinni af einni blóð­ug­ustu árás Ísra­els­hers til þessa í máli og myndum. Þá segir hann sögur Palest­ínu­manna, sögur bæði sjúk­linga og heil­brigð­is­starfs­fólks, sem þrátt fyrir allt eru bæði vin­gjarn­legir og gest­risnir.

Stundin sett­ist niður með Mads Gilbert og fékk að fræð­ast betur um störf hans á Gaza og þennan ein­staka mann sem í hættir sér ítrekað á stríðs­svæði til þess að aðstoða þá sem þurfa svo sár­lega á athygli okkar og sam­stöðu að halda.  

Mynd: Mads Gilbert

Stríðsglæpir og glæpir gegn mannkyni

Í síð­ustu viku kom út ítar­leg rann­sókn­ar­skýrsla á vegum Mann­réttinda­ráðs Sam­ein­uðu þjóð­anna um inn­rás­ina á Gaza í júlí og ágúst á síð­asta ári. Nið­ur­staða skýrslu­höf­unda er sú að alþjóða­lög voru brotin og að mögu­lega hafi verið um stríðs­glæpi að ræða. 

Íbúar Gaza

*tölur teknar saman af Mads Gilbert upp úr skýrslum Sameinuðu þjóðanna

1,8 millj­ónir manns búa á Gaza svæð­inu

43,6 % eru undir fimmtán ára aldri

Miðgildi ald­urs er 17,6 ár

Atvinnu­leysi er 50%

71,5% eru flótta­menn

„Ég vona að hver ein­asti stjórn­mála­maður í vest­ur­heimi muni lesa skýrsl­una því hún er mjög átak­an­leg,“ segir Mads. „Í mínum huga er eng­inn vafi að árásir Ísraels á Gaza voru stríðs­glæpir og að öllum lík­indum einnig glæpir gegn mann­kyni.“ Hann bendir einnig á að í vopn­uðum átökum flýji almennir borg­arar vana­lega heim­ili sín eftir einn eða tvo daga. Þeir leiti skjóls í nágranna­lönduð eða héröðum. „En á Gaza getur eng­inn flúið. Það er ekk­ert skjól. Sam­ein­uðu þjóð­irnar komu á lagg­irnar nokkrum neyð­ar­skýlum í skólum sínum og í skýrsl­unni er það nákvæm­lega skráð hvernig Ísra­els­menn sprengdu þessi neyð­ar­skýli og drápu tugi sak­lausra borg­ara og börn sem reyndu að finna ein­hvern griða­stað í skólum og undir vernd­ar­væng Sam­ein­uðu þjóð­anna.“

Í skýrsl­unni kemur fram að flótta­manna­að­stoðin, sem rak athvörfin í skól­unum, var í reglu­legum sam­skiptum við Ísra­els­menn og lét þá margoft