Lögreglumaðurinn sem nú situr í gæsluvarðhaldi á Litla-Hrauni grunaður um alvarleg afbrot í starfi tók þátt í umdeildri tálbeituaðgerð lögreglunnar í máli Mirjam van Twuyer, hollensku konunnar sem var dæmd í ellefu ára fangelsi fyrir fíkniefnasmygl í fyrra. Tálbeituaðgerðin fór fram í apríl síðastliðnum og hefur verið talsvert gagnrýnd þar sem maðurinn sem tók við fíkniefnunum, Atli Freyr Fjölnisson, var handtekinn áður en hann gat skilað þeim til höfuðpaursins í málinu.
Mirjam staðfestir við Stundina að lögreglumaðurinn sem situr í gæsluvarðhaldi hafi verið með henni á hótelherberginu á Hótel Fróni þegar hún beið eftir því að sendisveinninn, Atli Freyr, kæmi og tæki við fíkniefnunum. Óvíst er hvort málin tvö tengist en ljóst er að eitthvað fór alvarlega úrskeiðis í umræddri lögregluaðgerð.
Ómar Örn Bjarnþórsson, lögmaður lögreglumannsins, segist í samtali við Stundina ekki vita hvort skjólstæðingur sinn hafi verið handtekinn vegna þess máls. „Ég get ekki sagt nokkurn skapaðan hlut því hann er í einangrun á grundvelli rannsóknarhagsmuna og ég þar af leiðandi get ekki verið að tjá mig um það og eyðileggja fyrir rannsókninni, fyrir utan það að ég veit sem minnst,“ segir Ómar Örn. Aðspurður hvort málið tengist tálbeituaðgerðinni svarar hann: „Ekki hugmynd“.
Lögreglumaðurinn er á fimmtugsaldri og hefur starfað um nokkurt skeið hjá fíkniefnadeild lögreglunnar á höfuðborgarsvæðinu. Hann var vel liðinn af samstarfsmönnum, samkvæmt Vísi en er grunaður um að hafa átt í óeðlilegum samskiptum við brotamenn samkvæmt sama miðli. Hann hefur setið í gæsluvarðhaldi frá 29. desember og losnar að öllu óbreyttu á föstudaginn. Ómar Örn segir ekki hafa komið til tals hvort það verði framlengt. Samkvæmt nýrri frétt RÚV var annar maður handtekinn í dag vegna málsins. Sá hefur hlotið dóm fyrir fíkniefnalagabrot.
Athugasemdir