Pétur Richter, fyrrverandi stjórnarformaður BM Vallár og núverandi starfsmaður Arion banka, vekur athygli á meintri vinstrislagsíðu í félagsfræði 303 í Fjölbrautaskólanum í Ármúla á Facebook-síðu sinni í dag. Fjöldi þekktra hægri- og vinstrimanna tjá sig svo í athugasemdum. „Glósur kennara í stjórnmálafræðikúrs í ónefndum framhaldsskóla! Gott að vita að börnunum eru kennd fræðin af hlutleysi og yfirvegun,“ skrifar Pétur og birtir mynd af glósum.

Glósurnar Þessar glósur eru sagðar sýna vinstrislagsíðu.

„Svona er þetta alls staðar þar sem maður hefur séð til kennslu í sögu, samfélagsfræði, stjórnmálum og hagfræði. Menntakerfið er ein allsherjar heilaþvottavél,“ skrifar Gunnlaugur Jónsson, fjárfestir, frjálshyggjumaður og rithöfundur, við færsluna.

Gjaldkeri Samfylkingarinnar, Vilhjálmur Þorsteinsson, spyr því næst á móti hvað sé rangt við þessa túlkun á hægri og vinstri áherslum. Andri Snær Magnússon skáld blandar sér því næst í umræðuna. „Þurfa börnin tíma hjá Hannesi til að kolefnisjafna þau? Heilaþvottavélin þar hafði varanleg áhrif á nokkra í þessum þræði!“ skrifar höfundur Draumalandsins.

Væntanlega hægri maður

Hannes Hólmsteinn Gissurarson prófessor kemur með sína túlkun á glósu vinstimannanna í FÁ. „Þetta er furðuleg lýsing á stjórnmálaskoðunum. Ég telst væntanlega hægri maður, en ég er hlynntur almennum mannréttindum, þ.á.m. og ekki síst eignarréttinum. Ég tel ójafna tekjudreifingu ekkert keppikefli, en geri engar athugasemdir við hana, ef hún er afleiðing af frjálsu vali einstaklinganna.

„Ég tel ójafna tekjudreifingu ekkert keppikefli, en geri engar athugasemdir við hana“

(Ég tel óheppilegt að nota hið gildishlaðna orð „ójöfnuð“ um hana.) Frjálshyggja, sem ég aðhyllist, hefur frekar verið kennd við alþjóðahyggju en þjóðernishyggju, þótt ég telji raunar, að menn geti verið hvort tveggja, heimsborgarar og þjóðræknir. Ég er mjög hlynntur vísindum og tækni, svo að mig má telja rökhyggjumann, þótt ég hafi litla trú á því, að við komumst að skynsamlegum niðurstöðum á fundum eða í atkvæðagreiðslum. Allt þetta hefur verið margskýrt í fjölda bóka, til dæmis í bókum mínum um stjórnmálaheimspeki. En þrátt fyrir það er þessi aulaspeki tuggin í blessaða nemendurna,“ skrifar Hannes.

„Fráleit einföldun“ hjá FÁ

Áður en langt er um liðið fer umræðuefni út í rifrildi Hannesar og Vilhjálms. „Ég geri ráð fyrir að á þessari glæru sé verið að lýsa megindráttum í stefnu vinstri flokka og hægri flokka almennt, eins og þeir koma fyrir í löndum með svipað stjórnarfar og á Íslandi. „Hreinir“ frjálshyggjuflokkar eru af einhverjum ástæðum hvergi fyrirferðarmiklir, enda hefur hreinni frjálshyggju hvergi verið hrint í framkvæmd (nema hvað Síle reyndi eitthvað í þá átt með skelfilegum afleiðingum). Ég hef ekki tekið eftir að dæmigerðir hægri (íhalds-) flokkar séu mikið að hafa áhyggjur af mannréttindum; áherslan er miklu fremur á þjóðaröryggi og varnir ýmis konar, þar á meðal til dæmis hleranir og „forvirkar rannsóknarheimildir“ sbr. Björn Bjarnason,“ skrifar Vilhjálmur í svari við túlkun Hannesar.

Hannes kveðst á endanum ósáttur við einföldunina: „En aðalatriðið er, að þessi lýsing á stjórnmálastefnum, sem kennd er í FÁ, er fráleit einföldun.“

Ekki náðist í Þórð Sigurðsson fagstjóra félagsfræði og fjölmiðlafræði við FÁ við vinnslu fréttar.