Illugi Gunnarsson, mennta- og menningarmálaráðherra, hyggst setja á fót stýrihóp í ráðuneytinu um hlutverk og framtíð Ríkisútvarpsins sem muni skila þingsályktunartillögu næstkomandi vor. „Þannig gæfist Alþingi tækifæri til að ræða um framtíð Ríkisútvarpsins og framtíð þeirra verkefna sem Ríkisútvarpinu er ætlað að sinna. Á grundvelli slíkrar umræðu gætum við haldið áfram, hvort sem það leiðir til breytinga á þjónustusamningi, breytinga á lögum eða annars,“ sagði Illugi meðal annars á kynningarfundi um skýrslu nefndar Eyþórs Arnalds um starfsemi og rekstur RÚV fyrr í dag.  

Ólíkt fyrirkomulag eftir fimm ár

Illugi sér fyrir sér að stýrihópurinn muni skoða hlutverk og fyrirkomulag Ríkisútvarpsins á næstu fimm árum. „Hvernig sinnum við best þeim verkefnum og þeim skyldum og náum best þeim markmiðum sem eru sett hvað varðar almannaútvarpið sem snúa að menningu þjóðarinnar, sögu hennar, vísindum og lýðræðislegum vettvangi. Ég hafði þá hugsað mér að efna til vinnunnar þannig að það væri til dæmis hægt að leggja fram á þingi seint í vor þingsályktunartillögu sem tæki á þessum málum,“ segir Illugi í samtali við Stundina. „Ég get illa séð það fyrir mér að eftir fimm ár, í ljósi allra þeirra tæknibreytinga sem hafa orðið og í ljósi alls þess aðgengis sem almenningur hefur nú af skemmtiefni, afþreyingarefni, fræðsluefni, menningarefni úr svo mörgum ólíkum áttum, að við verðum enn með sama fyrirkomulag eftir fimm ár. Mér finnst erfitt að sjá það fyrir mér.“