Samkvæmt rástímayfirliti Hlíðavallar á golf.is átti Höskuldur Þór Þórhallsson, þingmaður Framsóknarflokks, bókaðan leik í gær klukkan 13:50. Á sama tíma fór fram þingfundur á Alþingi þar sem rætt var meðal annars um vernd og orkunýtingu landsvæða.
„Heyrðu, ég afbókaði tímann. Ég bið að heilsa,“ sagði Höskuldur í samtali við Stundina áður en hann skellti á blaðamann. Höskuldur svaraði ekki símanum þegar hringt var til baka.
Höskuldur er með þeim þingmönnum Alþingis sem hefur versta mætingu. Píratar tóku saman mætingu þingmanna á síðasta kjörtímabili. Í þeim gögnum kemur fram að á síðasta kjörtímabili var Höskuldur með næstverstu mætingu á eftir Árna Johnsen, en allt kjörtímabilið var Höskuldur með 749 fjarvistir við atkvæðagreiðslur. Hann var því mættur við einungis 48.4 prósent atkvæðagreiðslna.
Reyndist fjarverandi
Á sama tíma og Höskuldur hugðist fara í golf fóru fram nokkuð hörð orðaskipti á Alþing, enda stór mál sem átti bæði að kjósa um og ræða. Þar má nefna atkvæðagreiðslu um frumvarp um meðferð og sölu eignarhluta ríkisins í fjármálafyrirtækjum sem fór fram klukkan 14:47. Þá atkvæðagreiðslu var Höskuldur fjarverandi. Samkvæmt því frumvarpi verður bankasýsla ríkisins lögð niður og eignarhlutur ríkisins fer undir fjármála- og efnahagsmálaráðherra.
Umræða til níu um kvöldið
Því næst fór fram umræða um áætlun um vernd og orkunýtingu landsvæða. Lagt er til að alls fimm virkjanakostir verði færðir úr biðflokki rammaáætlunar í nýtingarflokk, en þetta eru Hvammsvirkjun, Holtavirkjun, Urriðafossvirkjun, Skrokkölduvirkjun og Hagavatnsvirkjun. Stjórnarandstaðan hefur gagnrýnt þetta harðlega og svo fór að umræðu lauk ekki fyrr en um níuleytið.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir