Hafði nýlega ráðið sig í vinnu sem þroskaþjálfi

Arnar Jónsson Aspar, sem lést í kjöl­far hrotta­legrar lík­ams­árásar á mið­viku­dag, var lærður þroska­þjálfi og nýbú­inn að ráða sig í vinnu sem slíkur. Hann átti að hefja störf 1. júlí næst­kom­andi. Þetta segir Klara Ólöf Sig­urð­ar­dóttir, móður­syst­ir Heiðdís­ar Helgu Aðal­steins­dóttur, kær­ustu Arnars, í sam­tali við Stundina. „Hann var ofsa­lega barn­góður og það átti vel við hann að vinna með fötl­uðum, en hann vann mikið við það hérna áður fyrr,“ segir hún.  

Síð­ast­lið­inn vetur hafi Arnar hins vegar meðal ann­ars unnið við snjó­mokstur, en á Facebook-síðu hans segir einmitt að hann vinni við snjó­mokstur, söltun og söndum. Þá hafi hann verið á fullu í hesta­mennsku. „Hann var sjálfur með hesta í sveit­inni og tók að sér að temja hesta fyrir aðra,“ segir Klara Ólöf. Arnar var meðal ann­ars virkur með­limur Hesta­manna­fé­lags­ins Harðar í Mos­fellsbæ, var full­trúi æsku­lýðs­nefndar félags­ins fyrir nokkrum árum og tók meðal ann­ars við Æsku­lýðs­bikar Lands­sam­bands hesta­manna­fé­laga árið 2011 fyrir hönd félags­ins. 

„Það vant­aði ekki hjálp­sem­ina í þessum manni.“

„Þetta var ofsa­lega indæll maður,“ segir Klara Ólöf.  „Hann vildi allt fyrir alla gera. Ynd­is­legur náungi og mik­ill dugn­að­ar­forkur. Ef maður hringdi í hann og bað hann um að hjálpa sér, þá var hann kom­inn eftir fimm mín­útur. Það vant­aði ekki hjálp­sem­ina í þessum manni.“

„Hann var óskap­lega hlýr og góður maður og reynd­ist Heiðdísi vel. Þá var hann ofsa­lega góður við afa Heið­dísar en þeir voru miklir vinir. Hann var ein­fald­lega mjög kær­leiks­ríkur,“ sagði góð vin­kona hins látna og Heið­dísar í sam­tali við Stundina, en hún treysti sér ekki til að koma fram undir nafni. 

Fær áfallahjálp eftir helgi

Heiðdís Helga, unnusta Arnars, var á meðal þeirra sem urðu vitni að árásinni. Klara Ólöf segir Heiðdísi Helgu vera í miklu áfalli eftir að hafa horft upp á mis­þyrm­ing­arnar. Það sé prestur hjá henni núna og að eftir helgi fái hún áfalla­hjálp. 

Heiðdís og Arnar eign­uð­ust dóttur þann 27. maí síð­ast­lið­inn og var hún því ein­ungis tíu daga gömul þegar faðir hennar lést. Dóttirin var sof­andi á meðan árásin átti sér stað. Arnar átti eina dóttur úr fyrra sam­bandi, en hún er 15 ára gömul. Dóttirin unga var sof­andi á meðan árásin átti sér stað en auk Heið­dísar urðu for­eldrar Arnars og afi Heið­dísar vitni að árásinni. Eins og fram kom í frétt mbl.is í gær fékk afi í kjöl­farið fyrir hjartað og var fluttur með sjúkra­bíl á sjúkra­hús, þar sem hann dvelur enn. 

Fjölskyldan þvertekur fyrir að um fíkniefnaskuld hafi verið að ræða

Sex hafa verið úrskurð­aðir í gæslu­varð­hald fyrir aðild að manns­drápi, fimm karlar og ein kona, en meðal þeirra eru Jón Trausti Lúth­ers­son, Sveinn Gestur Tryggva­son og bræð­urnir Marcin og Rafat Nabakowski. Menn­irnir fimm verða í gæslu­varð­haldi til 23. júní en konan til 16. júní, en lög­regla fór fram á jafn langt gæslu­varð­hald yfir þeim öllum. 

Sveinn Gestur Tryggva­son

Mynd: Facebook

Atburða­rás mið­viku­dags­kvölds­ins var ítar­lega rakin í Frétta­blað­inu í morgun. Fólkið hafi komið á tveimur bif­reiðum að heim­ili Arnars að Æsu­stöðum í Mos­fells­dal rétt eftir klukkan sex síð­degis, bankað upp á og ráð­ist á hann með bar­smíðum og spörkum fyrir utan heim­ili hans. Einn hinna grun­uðu, Sveinn Gestur, er meðal ann­ars sagður hafa stokkið á bak Arnars og tekið hann háls­taki með vinstri hendi en barið Arnar í and­litið með hinni hend­inni þar til hann missti með­vit­und. Þess má geta að Sveinn Gestur og Arnar eru æsku­vinir. 

Frétta­blaðið greinir einnig frá því að Sveinn Gestur hafi sjálfur hringt á Neyð­ar­lín­una og beðið um sjúkra­bíl. Þá heyr­ist Sveinn hreyta ókvæð­is­orðum að hinum látna um meinta fíkni­efna­skuld. 

Klara Ólöf stendur hins vegar við þau orð að ekki hafi verið um fíkni­efna­skuld að ræða en að öðru leyti viti fjöl­skyldan ekki hvert til­efni árás­ar­innar hafi verið. Hún segir að Arnar hafi verið búinn að vera edrú í mörg ár.

Auglýsti líkamsrækt æskuvinar síns

Mynd: Facebook

Sveinn Gestur rekur meðal ann­ars fyr­ir­tækið Aðal Garða­þjón­ust­una, sem sér meðal ann­ars um beða­hreins­anir, snyrt­ingu og grisjun trjá­þyrp­inga, trjá­fell­ingar, tún­þök­u­lögn, hekk­klipp­ingar, hellu­lögn, sól­palla­smíði og allar aðrar lóða- og garð­fram­kvæmdir. Samkvæmt heim­ildum Stund­ar­innar munu Jón Trausti, Marcin og Rafat allir hafa starfað fyrir garða­þjón­ust­una. 

Þá er Sveinn einnig einka­þjálf­ari og rekur lík­ams­rækt­ina Steve’s gym í Kópavogi. Arnar, hinn látni, aug­lýsti lík­ams­rækt­ina á Facebook-síðu sinni mars og sagði aðstöð­una hjá æsku­vini sínum glæsi­lega. „Allt sem þarf á einum stað, ásamt frá­bærri aðstoð við æfingar auk vand­aðri einka­þjálfun með góðri eft­ir­fylgni. Ég mæli með þessum huggu­lega og frá­bæra stað þar sem árangur lætur sig ekki vanta,“ skrif­aði Arnar.