Reglulega heyrast byssuhvellir frá Reykjavíkurflugvelli. Um er að ræða starfsmenn Reykjavíkurflugvallar sem skjóta gæsir til að tryggja að þær lendi ekki í hreyflum flugvéla.
Á síðasta ári voru fimmtán gæsir skotnar af starfsmönnum Reykjavíkurflugvallar á vellinum. Það er þó aðeins neyðarkostur í fremur flóknu og miklu verndarkerfi flugvallarins gegn fiðurfé. Engin gæs hefur þó verið skotin í ár og kann það að skýrast að gerviuglur hafi nýverið verið teknar í notkun. Að sögn Guðna Sigurðssonar, upplýsingafulltrúa Isavia, voru ríflega fjórtán þúsund gæsir fældar frá flugvellinum í fyrra. Að hans sögn er mikill meirihluti fugla sem eru fældir frá gæsir og stöku mávar.
Kortlagt í þaula
Guðni segir að fælingar á fiðurfé séu kortlagðar í þaula af starfsmönnum flugvallarins. „Þetta er þannig að við byrjum á að meta hættuna, kortleggja hvaða dýr eru svæðinu og hver sé hættan af þeim. Við reynum að gera búsetusvæðin innan flugvallarins þannig að þau vilji ekki vera þar. Það sem er eftir er fælt,“ segir Guðni. Hann segir að fjöldi leiða séu nýtar til að fæla dýrin frá flugvélum. „Það er stundum skotið fælingarskoti að tuttugu gæsahópi. Þeir kortleggja þetta alveg nákvæmlega. Það voru fimmtán gæsir skotnar í fyrra en það er neyðarúrræði ef þær eru taldar ógna flugöryggi og fælingar hafa ekki virkað,“ segir Guðni.
Keyra um og skjóta gæsirnar
Hvað varðar gæsirnar sem eru skotnar segir Guðni að það sé meðal annars til að auka fælingarmátt. „Það eru fjórir menn á flugvellinum sem hafa leyfi til að gera þetta. Þeir eru með skotvopnaleyfi og keyra á bíl með byssu og skjóta þær. Þetta er gert eftir samþykkt frá lögreglunni og við höfum sérstök leyfi innan þéttbýlis, það er að segja innan flugvallargirðingar,“ segir Guðni. Hræin eru svo urðuð sem og lífræn úrgangur, settar í lífræna ruslatunnu.
Hræðast ekkert fokkerinn
Guðni segir að keyrt sé að gæsahóp til að fæla þær en ein algengasta leiðin sem er notuð séu hvellhettur sem reglulega springa á ákveðnum svæðum. Gerviuglur virðast þó virka einna best. „Við tókum upp gerviuglu sem hreyfist í vindi. Hún virkar ansi vel. Uglur éta egg gæsa,“ segir Guðni. Eitt það áhugaverðasta við gæsirnar sem starfsmenn flugvallarins hafa komist að er að þær gera upp á milli flugvéla. „Þær læra á flugvélarnar. Ef það er ný flugvél þá fljúga allar gæsirnar í burtu en þær hræðast ekkert fokkerinn,“ segir Guðni.
Athugasemdir