Fréttir afþreyingarmiðlanna Hún.is og Fréttanetsins, um stúlkuna sem stórstjarnan Justin Bieber eyddi nótt með þegar hann dvaldi hér á landi í síðustu viku, hafa verið fjarlægðar að beiðni fjölskyldu stúlkunnar. Þetta staðfestir Kidda Svarfdal ritstjóri Hún.is í samtali við Stundina. 

Á miðvikudag birti Hún.is Instagram-myndir af stúlkum sem voru sagðar hafa eytt nóttinni með Justin Bieber. Þar var einnig fullyrt að „ein stúlknanna hafi farið með Justin upp á hótelherbergi.“ Fleiri miðlar fylgdu í kjölfarið og endursögðu frétt Hún.is. Fréttanetið gekk hins vegar skrefinu lengra og nafngreindi stúlkuna sem átti hafa farið með söngvaranum á hótelherbergið. Fyrirsögn fréttarinnar var „Ég fokking reið jb“ en þar var vísað í skjáskot af SMS-skilaboðum sem miðillinn hafði undir höndum.

Fréttirnar vöktu hörð viðbrögð í athugasemdakerfum fjölmiðla sem og á samfélagsmiðlum. Sumir beindu orðum sínum að stúlkunum á meðan aðrir fordæmdu fjölmiðlana fyrir nafnbirtinguna og drusluskömmun. 

Samræmist ekki siðareglum

Valgerður Anna Jóhannsdóttir, aðjúnkt í blaða- og fréttamennsku við Háskóla Íslands, telur nafnbirtinguna ekki samræmast siðareglum blaðamanna eða þeim faglegu kröfum sem gerðar eru til fjölmiðlafólks. „Hér hefur það ekki verið lenska að birta jafn persónulegar upplýsingar eins og þessar um venjulegt fólk. Jafnvel þótt að um opinbera persónu hafi verið að ræða þá teldist þetta utan marka og ekki eitthvað sem almenningur á heimtingu á að vita því það varði einhverja hagsmuni.“