Fyrirtækið GMR (Geot­hermal Metal Recycl­ing) hefur sætt dagsektum frá Umhverfisstofnun vegna ítrekaðra vanefnda. Ófullnægjandi mengunarvarnir og ítrekaðar vanefndir á lagfæringu þeirra eru ástæða dagsektanna. Myndbönd sem tekin voru fyrir tveimur árum sýna greinilega mengunina, svartan reyk, sem kemur út um dyr endurvinnslunnar. Voru það myndböndin sem vöktu fyrst athygli eftirlitsmanna.

Umhverfisstofnun hefur ítrekað gert athugasemdir við mengunarmál, en einnig við aðstöðu starfsmanna. Síðustu 4 ár hafa verið gerðar tæpar 40 athugasemdir við ýmis atriði, sem talin eru frávik sem eru brot á starfsleyfi fyrirtækisins. Meðal annars að útblástur fari ekki inn í þar til gerða reykháfa og fylli því verksmiðjuhúsið. Magn mengunarefna í útblæstri hefur einnig farið yfir viðmiðunarmörk, ekki hefur verið malbikað nema að hluta í kringum verksmiðjuna og verður það því oft að forarsvaði sem blandast úrgangi.

Slæmar aðstæður starfsfólks

Starfsmaður sem Stundin ræddi við, og hefur komið að svæðinu öðru hvoru frá því farið var í framkvæmdir, lýsir aðstæðum sem slæmum. „Það er óþolandi að horfa upp á framkomuna við starfsmenn, sem byggist eingöngu á því að þetta eru Pólverjar,“ segir hann. Þá segir hann að sér ofbjóði sóðaskapurinn og framkoman við starfsfólkið, sem eru nánast einungis útlendingar.

Aðstaðan og virðing við starfsfólkið, sem flestir eru erlendir verkamenn, segir hann fyrir neðan allar hellur. „Það er óþolandi að horfa upp á framkomuna við starfsmenn, sem byggist eingöngu á því að þetta eru Pólverjar. Ég segi fyrir mig, ef að ég ætti að fara að vinna hérna, ég færi bara beinustu leið heim á báðum skóm, ef ég ætti að vinna inni í þessari verksmiðju, með aðstæðurnar eins og þær eru núna. Ég myndi ekki láta bjóða mér það. Þótt ég hefði ekkert að gera. Þegar að við vorum þarna inni var húsið gjörsamlega kjaftfullt af reyk. Og þetta er 3.600 fermetra hús með 18 metra lofthæð. Maður sá ekki á milli augna eins og sagt er. Þannig við vorum mjög ósáttir með þetta, og svo hef ég fengið símtal frá nýjum verksmiðjustjórum og ég hef bara komið mér undan því að þurfa að vinna meira þarna inni.“

Maðurinn starfaði hjá GMR áður en framleiðsla hófst. „Það fór að vekja eftirtekt eftir smá tíma að maður fór að heyra þegar fór að líða að lokum framkvæmdarinnar að það ætti að keyra þetta í gang á bráðabirgðaleyfi, sem varir enn.“