Kvenréttindafélag Íslands vekur athygli á auglýsingu sem birtist í Fréttablaðinu í morgun á Facebook-síðu sinni. „Fílar þú þig sem harðkornadekk í dag?“ spyr félagið á Facebook.
Auglýsingin, sem er á vegum Dekkverks, sýnir dekk sem búið er að móta í kvenmannslíkama. Í samtali við Stundina segir Brynhildur Heiðar- og Ómarsdóttir, framkvæmdastýra félagsins, að um er að ræða dæmigerða og bókstaflega hlutgervingu kvenlíkamans. „Þetta er klassískt og bókstaflegt dæmi um hlutgervingu þegar konu er breytt í dekk. Ég skil ekki alveg hugsunina bak við þessa auglýsingu. Árið er 2015 og ég hélt að tími svona auglýsinga væri löngu liðinn,“ segir Brynhildur.
Hún bendir á að varan sem er auglýst komi líkama kvenna ekkert við. „Þetta snýst um hvernig kyn kvenna er smættað niður í hluti og svo notað í að auglýsa vöru sem tengist líkama kvenna ekki neitt. Það sem mér flaug strax í hug er hinn frægi Michelin-maður. Þá sér maður að þegar karlar eru notaðir, því Michelin-maðurinn er karlmaður og þetta er karllíkami, þá er hann fígúra sem er gerandi í auglýsingunni. Það er ekki verið að gera út á að hann sé sexí eða fallegur. Það er ekki verið að segja: „Girnstu mig“,“ segir Brynhildur.
Hún bendir enn fremur á að öll áhersla í auglýsingunni sé á brjóst dekkjakonunnar og hún hafi ekki einu sinni haus. „Síðan sjáum við þessa auglýsingu þar sem ekki nóg með það að þetta sé kvennlíkaminn sem er smættaður niður í dekk þá er hún algjörlega hauslaus líka. Það vantar á hana alla útlimi og það eina sem er lagt áhersla á eru brjóst, magi, rass og læri. Það er ekki verið að nota konu sem talskonu dekkja,“ segir Brynhildur.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir