Vöruskiptajöfnuður var jákvæður í kjölfar efnahagshrunsins, þegar einkaneysla og fjárfestingar duttu niður. Nú er hann aftur orðinn neikvæður, sem staðfestir að Ísland er í uppsveiflu. Á fyrstu níu mánuðum ársins var tæplega 90 milljarða halli á vöruskiptum við útlönd en alls voru fluttar út vörur fyrir 405,7 milljarða króna en inn fyrir 495,3 milljarða. Þetta kemur fram í tilkynningu á vef Hagstofunnar. Innflutningur á hrá- og rekstrarvörum og eldsneyti dróst töluvert saman en á móti jókst innflutningur á fjárfestingavörum og flutningatækjum til muna. Til að mynda jókst innflutningur fólksbíla um 38 prósent, flugvéla um 42 prósent og innflutningur flutningatækja til atvinnurekstrar, annarra en flugvéla og skipa, um 55 prósent.
Í takti við hagsögu Íslands
Ásgeir Jónsson, forseti Hagfræðideildar Háskóla Íslands, segir að þetta séu allt dæmigerð einkenni íslenskrar uppsveiflu.
„Ísland er afar opið hagkerfi og við flytjum inn nær allar varanlegar neysluvörur og fjárfestingarvörur sem við þurfum. Það þýðir að um leið og innlend eftirspurn og fjárfesting tekur við sér eykst innflutningur. Þannig hafa uppsveiflur yfirleitt alltaf leitt til halla á vöruskiptum en viðskiptaafgangur birtist við niðursveiflu, líkt og eftir hrun þar sem mjög dró bæði úr fjárfestingu og innlendri eftirspurn.“
Athugasemdir