DNA rannsókn hefur staðfest að Sveinn Andri Sveinsson lögmaður er faðir barns Rebekku Rósinberg. Saga Rebekku vakti gífurlega athygli í fyrra eftir að hún steig fram í DV og sagði að hún hefði kynnst honum aðeins sextán ára gömul. Í kjölfarið hefði hún orðið ólétt og eignast barnið sautján ára gömul. Sveinn Andri neitaði því í samtali við DV á sínum tíma að hann væri faðirinn og sagði það byggt á misskilningi. „Það er einhver misskilningur, það er rangt. Ég ætla ekkert að vera ræða um þetta við þig. En þetta er ekkert rétt. Ég hef ekkert um þetta að segja,“ var haft eftir lögmanninum. Faðernið hefur nú verið staðfest með DNA prófi.

Rebekka vildi ekki tjá sig um málið við Stundina, en þau deila um viðurkenningu á faðerninu og meðlagsgreiðslur. Sveinn Andri vildi ekki heldur tjá sig um málið þegar Stundin óskaði eftir viðbrögðum hans nú.

Málið snýr þó ekki aðeins að deilum á milli þeirra, en Beauty tips byltingin #þöggun á rætur sínar að rekja til málsins. Fyrr á árinu birti vinkona Rebekku, Guðrún  Helga Guðbjartsdóttir, stöðuuppfærslu í lokuðum hópi kvenna á Facebook sem kallast Beauty tips, þar sem hún spurði hvort einhver þar hefði „lent í Sveini Andra“.

Af því tilefni sagði Rebekka í samtali við Stundina að markmið færslunnar hefði verið að safna sönnunargögnum fyrir nýja kæru vegna meintrar tælingar Sveins Andra. Hún kærði hann á sínum tíma fyrir tælingu gegn ólögráða einstaklingi en málið var fellt niður, vegna skorts á sönnunargögnum.

Upphaf Beauty tips byltingar

Fréttir voru sagðar af stöðuuppfærslu Guðrúnar Helgu og í kjölfarið var fjarlægðu stjórnendur síðunnar þessa umdeildu færslu. Meðlimum síðunnar misbauð sú aðgerð og í kjölfarið hrúguðust inn persónulegar frásagnir af kynferðisofbeldi undir myllumerkinu #þöggun.

Edda Ýr Garðarsdóttir myndlistarkennari bjó stuttu síðar til gular og appelsínugular myndir sem urðu táknmynd umræðunnar. Fjölmargir Íslendingar breyttu forsíðumyndum sínum á Facebook til að sýna baráttunni gegn þöggun stuðning í verki.

Málið vakti athygli utan landsteina og var meðal annars fjallað um vitundarvakninguna í bandaríska tímaritinu New Yorker.

Þá hélt Andrés Ingi Jónsson, varaþingmaður Vinstri grænna, ræðu í eldhúsdagsumræðum á Alþingi í sumar þar sem hann ræddi Beauty tips byltinguna.  

„Umræðan barst okkur körlunum síðan þegar sögur og myndir tóku að birtast á samfélagsmiðlum. Þolendur ofbeldis merktu sig appelsínugulum andlitum. Gul andlit urðu táknmynd allra hinna, sem þekkja þolendur ofbeldis. Appelsínugulu andlitin voru ótrúlega mörg. Svo mörg, að mér leið helst eins og náttúruhamfarir hefðu orðið. Í náttúruhamförum hefðu viðbrögðin ekki staðið á sér. Þá skipuleggja stjórnvöld fjöldahjálparmiðstöðvar, þau bretta upp ermarnar og taka til óspilltra málanna. Þau laga það sem lagað verður. En hver voru viðbrögðin þegar þagnarmúrinn brast? Þau voru lítil. Að minnsta kosti ekki í neinu samræmi við umfang vandans,“ sagði Andrés.

Krafðist 10 milljóna

Líkt og fyrr segir var fyrst greint frá málinu í DV í fyrra þegar Rebekka lýsti samskiptum sínum við Svein Andra, sem hún sagðist hafa kynnst þegar hún var á fyrsta ári í menntaskóla.

Sveinn Andri hótaði að stefna ritstjóra DV og blaðamanni DV vegna umfjöllunarinnar. Þá krafðist hann þess að fá tíu milljónir króna í skaðabætur.  

Á meðal þess sem fram kom í umfjöllun DV var frásögn Rebekku af því hvernig Sveinn Andri brást við þegar hún sagði honum að hún væri barnshafandi. „Hann trúði mér ekki. Ég reyndar sagði honum þetta 1. apríl og hann hélt að þetta væri aprílgabb. Þegar hann áttaði sig á því að þetta væri satt þá sagði hann við mig að ég yrði að fara í fóstureyðingu. Hann sagðist ætla að kaupa handa mér ferð til Danmerkur. Ég ólst þar upp og var búin að segja honum að ég elskaði þann stað meira en allt og langaði að fara aftur. Hann bauðst til þess að borga fyrir mig út ef ég myndi fara og láta eyða fóstrinu. Hann vissi nákvæmlega hvaða takka hann ætti að ýta á,“ var haft Rebekku í DV. Sveinn Andri greiddi engu að síður meðlag með barninu til að byrja með og lýsti sig tilbúinn til þess að finna lausn.

Þá sagðist hún hafa verið svo brotin eftir samskiptin við Svein Andra að hún hefði þurft á sérfræðiaðstoð að halda. Á sínum tíma hafi henni þótt spennandi að hann væri þekktur, á fínum bíl og í flottu einbýlishúsi. Hún hafi hins vegar óþroskuð og hann hefði notfært sér yfirburðastöðu sína gagnvart henni. Á þeim forsendum hefði hún ákveðið að kæra hann fyrir tælingu.

Í sama viðtali ítrekaði Rebekka að það eina sem hún vildi væri réttlæti. „Ég vil bara fá réttlæti fyrir mig og son minn. Það á enginn að koma svona fram og núna veit ég að þetta var ekki mér að kenna. Ég var bara barn. Ég á ekki að þurfa bera þessa skömm heldur hann.“