Ellefu fylgdarlaus flóttabörn á Íslandi: „Þeim finnst að enginn vilji sjá þau“

Ellefu fylgd­ar­laus börn bíða úrlausnar sinna mála hér á landi. Í hópnum eru meðal ann­ars krakkar frá Sýrlandi, Írak, Marokkó, Alsír, Túnis og Sómalíu, sem mörg hafa varið löngum tíma í að ferð­ast í gegnum Evrópu. Þau hafa verið hér frá nokkrum vikum upp undir ár og bíða þess og vona að þau geti hafið nýtt líf. Guðríður Lára Þrast­ar­dóttir, tals­maður hæl­is­leit­enda hjá Rauða kross­inum, hefur hitt þau flest og sett sig inn í mál þeirra. Hún segir þeim líða illa. „Þau tala sum um að þau vilji ekki lifa lengur. Þau vilja bara lifa eðli­legu lífi og ganga í skóla en fá ekki að gera það. Þeim finnst að eng­inn vilji sjá þau.“

Eitt barn­anna er hinn sextán ára Muhiyo Hamud frá Sómalíu. Hann var fjórtán ára þegar hann flúði Sómalíu eftir að hafa verið í haldi hryðju­verka­sam­tak­anna Alshabab og komst lífs af þegar bát hans hvolfdi á leið­inni yfir Mið­jarð­ar­hafið. Hann hefur tvisvar reynt að svipta sig lífi. Hæl­is­um­sókn hans var synjað í Svíþjóð og nú hefur hann beðið í 7 mán­uði eftir því að mál hans verði tekið upp hér á landi. Hann deilir sögu sinni í nýjasta tölu­blaði Stund­ar­innar.