Í fréttatilkynningu sem birtist á heimasíðu Eflingar fyrr í dag er skotið á Verkalýðsfélag Akraness og gefið sterklega í skyn að Vilhjálmur Birgisson, formaður félagsins, hafi eignað sér sigur Eflingar í máli um bónusgreiðslur til starfsmanna HB Granda. Í samtali við Stundina gefur Vilhjálmur lítið fyrir þessi skot Eflingar og segir að Verkalýðsfélag Akraness hafi klárað málið. Ekki náðist í Sigurð Bessason við vinnslu fréttar. Hvað sem þessum deilum líður þá hafa bónusar starfsfólks HB Granda verið hækkaðir úr 9 í 18 prósent launahækkun.
Formaður Eflingar fundaði á föstudaginn
Í frétt sem birtist á heimasíðu Eflingar fyrr í dag er þó sterklega gefið í skyn að bónusgreiðslur séu Eflingu að þakka en ekki Verkalýðsfélagi Akraness. Gagnrýnin hefst strax í fyrirsögn: „Efling og HB Grandi: Atburðarásin að baki hækkunum bónusa“. Í fréttinni er farið yfir atburðarás sem sögð er hafa hafist með kröfu Eflingar en ekki Verkalýðsfélagi Akraness.
„Föstudaginn 17. apríl sl. hitti formaður Eflingar, ásamt trúnaðarmönnum Eflingar hjá HB Granda að máli forsvarsmenn Granda í Reykjavík. Á fundinum var rædd sú staða í fyrirtækinu sem upp var komin vegna hárra arðgreiðslna til eigenda og mikillar hækkunar stjórnarlauna Granda. Þetta mál hefði haft mikil og neikvæð áhrif á stöðu samningaviðræðna um nýja kjarasamninga. Efling lagði mikla áherslu á skjót viðbrögð í málinu. Forstjóri HB Granda tók vel í málaleitan Eflingar og samsinnti að fyrirtækið hefði svigrúm til launahækkana og myndi bregðast við þessu erindi strax dagana eftir eins og fram hefur nú komið,“ segir í fréttinni.
Verkalýðsfélag Akraness kláraði málið
Vilhjálmur gefur lítið fyrir þessar skýringar hjá Eflingu og segir að Verkalýðsfélag Akraness hafi unnið málið, ekki Efling. „Efling er í raun og veru að segja að þeir hafi átt fund með Granda á föstudaginn þar sem viðrað var að það þyrfti að gera eitthvað. Ég á fundi út og suður þar sem það er talað um að það þurfi að hækka laun, en það þarf síðan að gera hlutina. Það sem gerist í þessu samhengi er að forstjóri fyrirtækisins hefur samband við mig og trúnaðarmenn. Við fundum á mánudegi og hann spyr hvaða laun ég sjái til lausnar á því að lagfæra laun þessa fólks. Ég sagði við hann: „Heyrðu ég skal bara senda þér tillögu, drög að nýjum bónussamning“. Ég sendi honum samninginn, þannig að Verkalýðsfélag Akraness vann þennan bónussamning frá a til ö. Það er ekki nóg að tala, það þarf að vinna líka,“ segir Vilhjálmur.
„Copy paste“
Vilhjálmur segir að það sé ekkert mál að segja hluti á fundum, það sé ekki það sama og afgreiða þá. „Það er ekkert mál að segja að það þurfi að hækka laun hér og þar. Þessi samningur var undirritaður af forstjóra og mér klukkan hálf tíu í morgun og síðan var hann undiritaður í Reykjavík klukkan eitt í dag. Ég vænti þess að þetta sé bara „copy paste“ af samingnum sem ég kastaði hér upp í minni tölvu og er til,“ segir Vilhjálmur.
VA sagt hafa komið seinna
Í frétt Eflingar er enn fremur farið yfir hvernig forsvarsmenn verkalýðsfélagsins hafi lagt áherslu á skjótar aðgerðir hjá HB Granda gagnvart starfsfólkinu. „Skjótvirkasta leiðin að mati Eflingar væri að hækka bónusa umtalsvert og voru lagðar fram upplýsingar á fundinum um málið. Þá var mikil áhersla lögð á að fyrirtækið yrði að bregðast hratt við þar sem bæði væri ólga meðal starfsmanna auk þess sem ráðstafanir HB Granda yrðu áfram í umræðunni að öllu óbreyttu. Efling lagði mikla áherslu á að fyrirtækið hefði samband við önnur stéttarfélög HB Granda í fiskvinnslu þannig að breytingarnar næðu til allra starfsmanna HB Granda,“ segir í fréttinni. Með öðrum orðum er ýjað að því að Verkalýðsfélag Akraness hafi komið inn í málið á eftir Eflingu.
Athugasemdir