Útgáfufélag DV og Reynir Traustason, fyrrverandi ritstjóri blaðsins, voru í dag sýknuð í Hæstarétti af stefnu Söru Lindar Guðbergsdóttur vegna umfjöllunar um hana í desember 2012. Hæstiréttur snéri þannig við ákvörðun Héraðsdóms Reykjavíkur en á síðasta ári var félagið og ritstjórinn dæmd til að greiða Söru Lind 300 þúsund krónur í miskabætur og 621 þúsund króna málskostnað. 

Ekki opinber persóna

Stefán Einar Stefánsson, fyrrverandi formaður VR, og unnusta hans, Sara Lind Guðbergsdóttir, höfðuðu meiðyrðamál gegn blaðinu vegna umfjöllunar um ráðningu Söru Lindar til VR á þeim tíma sem Stefán Einar gegndi formennsku hjá VR. Sara Lind hafði verið ráðin í yfirmannsstöðu hjá VR þótt hún hafi ekki verið metin hæfust. Í umfjölluninni segir meðal annars að innan VR hafi sú saga gengið að áður en ráðningarferlið fór af stað væri búið að ákveða að Sara Lind fengi starfið. Stefán Einar skrifaði langa grein í Morgunblaðið á sínum tíma þar sem hann krafðist þess að blaðið biðjist afsökunar á umfjölluninni. Stefán Einar starfar nú sem blaðamaður hjá Morgunblaðinu.