Árni Páll Árnason, formaður Samfylkingarinnar, ber fullt traust til Björgvins G. Sigurðssonar varaþingmanns. Björgvin tók sæti Oddnýjar G. Harðardóttur á Alþingi í gær, en fyrr á árinu var hann leystur frá störfum sem sveitarstjóri Ásahrepps eftir að hafa brotið gegn starfsskyldum sínum með því að ráðstafa fjármunum úr sveitarsjóðnum án heimildar.
„Ég gerði upp öll mín mál hreinskilnislega, ég baðst afsökunar á mistökum mínum og leitaði mér aðstoðar. Ég vann úr því eins vel og ég gat og mér hefur gengið vel síðan. Ef ég teldi að svo væri ekki, þá myndi ég meta þetta með öðrum hætti,“ segir Björgvin í samtali við Stundina, aðspurður hvort ekki hefði verið eðlilegra að hann endurnýjaði sitt lýðræðislega umboð áður en hann tæki sæti á þingi.
„Lýsi yfir fullu trausti“
„Björgvin G. Sigurðsson hefur ekki verið sakaður um fjárdrátt,“ sagði Árni Páll í viðtali við Frosta og Mána í sjónvarpsútgáfu Harmageddon í gærkvöldi. Þegar spyrlarnir bentu á að Björgvin hefði vissulega verið sakaður um fjárdrátt sagði Árni: „Já, af mönnum sem síðast báðust afsökunar á að hafa gert það. Hann var í opinberu starfi hjá opinberum aðilum þar sem eru ríkar kröfur til þess að kæra til lögreglu ef eitthvað óeðlilegt er á seyði. Ef að eitthvað kærumál hefði komið upp hefði málið að sjálfsögðu blasað öðruvísi við.“
Ungir jafnaðarmenn hafa tvívegis hvatt Björgvin til að stíga til hliðar sem varaþingmaður. Árni Páll kveðst „gersamlega ósammála“ því sjónarmiði. „Það er bara ósköp einfaldlega þannig að Björgvin lauk sínum viðskiptum við sinn vinnuveitanda með samkomulagi sem báðir aðilar stóðu að og við þær aðstæður get ég ekki haft neitt um það að segja. Þannig að ég lýsi yfir fullu trausti til hans.”
Athugasemdir