Íbúar á Suðurnesjum hafa á samfélagsmiðlum gagnrýnt lögreglu svæðisins en hún stöðvaði för ökumanns í Reykjanesbæ á mánudaginn með því að aka í hliðina á honum. Stundin greindi frá málinu á vefnum en þar kom fram að ungt barn hafi verið í farþegasæti bifreiðarinnar.
Þetta sögðu vitni að árekstrinum sem blaðamaður Stundarinnar ræddi við. Eitt þeirra vitna tók ljósmyndir á vettvangi og sést hversu illa bifreiðin er farin sem lögreglan keyrði vísvitandi á. Lögreglan sagði í fréttatilkynningu vegna málsins að hún hafi veitt ökumanni eftirför skömmu eftir hádegi á mánudag en tilkynning hafði borist um mann akandi í annarlegu ástandi. Segir að maðurinn hafi verið á leið frá Keflavík í átt að Innri-Njarðvík þar sem för hans var stöðvuð með því að aka í veg fyrir hann.
Samkvæmt ljósmyndum frá vettvangi virðist lögreglubifreiðinni hafa verið ekið í hlið þess sem þeir eltu en ekki í veg fyrir bifreiðina. Fjölmargir íbúar hafa óskað eftir því að fá upplýsingar um verklagsreglur lögreglu í svona aðgerðum þegar lítið barn er í bifreiðinni en þeim þótti lögreglan leggja barnið í aukna hættu með framferði sínu. Samkvæmt heimildum Stundarinnar mun Ríkislögreglustjóri skoða málið, aðdragandann og þær forsendur sem lágu að baki þeirri ákvörðun að keyra utan í bifreiðina sem var með lítið barn innanborðs.
Athugasemdir