Maðurinn sem nýverið var dæmdur í sjö ára fangelsi fyrir gróf kynferðisbrot gegn syni sínum hefur farið einn með forsjá þriggja yngri barna sinna, allt frá árinu 2008. Árið 2007 skildu hann og barnsmóðir hans að skiptum og fékk hann fulla forsjá yfir börnunum ári síðar. Tvö þeirra eru í dag orðin lögráða en búa enn hjá föður sínum. Það þriðja, sem er enn á barnsaldri, býr einnig hjá föðurnum en er hjá móður sinni aðra hverja helgi.
Braut gróflega gegn syni sínum
Rétt tæp tvö ár eru liðin frá því að brotaþoli lagði fram kæru gegn föður sínum. Hann lýsti því að foreldrar hans hafi slitið samvistum þegar hann var ungur að árum. Frá 4 til 11 ára aldurs hafi hann farið aðra hverja helgi til föður síns, á árunum 1996 til 2003. Lýsti hann grófu ofbeldi alla barnæskuna. Á þessum tíma, þegar kæran var lögð fram, voru tvö barna mannsins enn undir lögaldri. Þrátt fyrir það bjuggu þau enn hjá honum og búa enn.
Úr dómnum má lesa að brotaþoli hafi brotið gegn trausti og trúnaði sonar síns með því að káfa í fjölda skipta á kynfærum hans og láta hann sömuleiðis káfa á kynfærum sínum. Þá nauðgaði hann honum í fjölda skipta í endaþarm. Dóminn í heild sinni má lesa hér.
„Ég reyndi margoft að segja frá“
Móðir barnanna þriggja, sem enn búa hjá föður sínum, var stjúpmóðir brotaþola um nokkurra ára skeið. Hún lýsti því fyrir dómi að brotaþoli hafi verið hjá þeim aðra hverja helgi. Hún hafi orðið vitni af ofbeldi, fyrst og fremst í orðum en einnig líkamlegu ofbeldi.
„Ég er ofboðslega reið út í kerfið, mér finnst það hafa brugðist mér og börnunum mínum“
Eftir því sem á leið hafi það líkamlega aukist. Hún hafi hins vegar aldrei orðið vitni að kynferðislegu ofbeldi. Hún segir meðal annars frá því að maðurinn hafi átt það til að stinga tám uppí brotaþola, sem hann hafi einnig gert við fleiri á heimilinu. Þá hafi brotaþoli oft verið læstur inni í herbergi sínu og hún hafi tekið þátt í því. Í samtali við blaðamann Stundarinnar gengst konan við því að hafa tekið þátt í ofbeldinu. „Ég var sjálf svo skemmd í rauninni, svo ég frekar tók þátt í ofbeldinu með honum heldur en að verja barnið,“ segir hún.
Spurð að því hvernig henni líði, nú þegar dómur hafi verið kveðinn upp yfir barnsföður hennar segir konan: „Ég hef alltaf haldið því fram að ofbeldi hafi verið til staðar á heimilinu og mér líður eins og það hafi loks verið samþykkt í þessum dómi. Það var ekki lygi í mér og ég reyndi margoft að segja frá því, til dæmis þegar ég var að reyna að fá forsjána yfir börnunum.“
Kerfið brugðist börnunum
Konan segir að öll börnin þrjú standi með föður sínum. „Hann hefur alltaf beitt börnunum gegn mér, þau trúa því að ég sé þessi vonda og ég hafi átt upptökin að þessari kæru. Þau þurfa hjálp og hefðu átt að fá hana fyrir löngu síðan. Ég er ofboðslega reið út í kerfið, mér finnst það hafa brugðist mér og börnunum mínum líka.“
Eldri dóttir konunnar, sem hún hafði eignast áður en hún tók saman við ákærða og bjó því einnig með honum um nokkurra ára skeið, deildi frétt um málið á Facebook í gær. Þar lýsir því að hún sé þakklát, því rödd hennar hafi fengið að heyrast og á hana hafi verið hlustað. „Eins og það sé loks sagt: Ég trúi ykkur. Þetta gerðist,“ skrifar dóttir hennar meðal annars.
„Eins og það sé loks sagt: Ég trúi ykkur“
Bjuggu eftirlitslaust hjá dæmdum barnaníðingi
Stundin hefur áður fjallað um börn sem búa með dæmdum barnaníðingum. Meðal annars hefur Stundin sagt sögu systranna Önnu, Lindu og Guðrúnar, sem allar voru misnotaðar af föður sínum, Kjartani Adolfssyni. Hann var fyrst dæmdur í tíu mánaða fangelsi fyrir að misnota Guðrúnu árið 1991. Síðar eignaðist hann dæturnar Önnu og Lindu með annarri konu og misnotaði þær líka. Þær voru allar á aldrinum 5 til 7 ára þegar hann byrjaði að brjóta gegn þeim. Guðrún lýsti því í viðtali við Stundina hvernig hún hafði reynt að vernda yngri systur sínar og lýsti furðu á því að dæmdir barnaníðingar fái að búa með börnum. Í október árið 2018 var Kjartan dæmdur fyrir kynferðisbrotin gegn þeim Önnu og Lindu.
Athugasemdir