Á bilinu tíu til fimmtán manns komu saman á Lækjartorgi um hádegisbil og stóðu þar undir fánum Norðurvígis, norrænu mótstöðuhreyfingarinnar.
Norðurvígi eru nýnasistasamtök sem eru með tengsl við Norrænu mótstöðuhreyfinguna, The Nordic Resistance Movement, samtök sem ríkislögreglustjóri hefur fjallað um í tengslum við hættu á hryðjuverkum. Norðurvígi hafa meðal annars dreift hatursáróðri gegn hælisleitendum og innflytjendum hér á landi.
Samtökin eru samansett af hópum í Svíþjóð, Finnlandi, Noregi, Danmörku, og nú Íslandi, sem vilja mynda nýtt sameinað ríki Norðurlandanna. Hóparnir á Norðurlöndum beita orðræðu nýnasista og hafa verið bendlaðir við ofbeldisverk. Voru þrír menn tengdir samtökunum í Svíþjóð dæmdir í fangelsi árið 2017 fyrir sprengjuárás í Gautaborg. Samtökin eru þá bönnuð í Finnlandi.
Meðal þeirra sem komu saman á Lækjartorgi var Simon Lindberg, formaður Norrænu mótstöðuhreyfingarinnar, og sést hann fyrir miðju á myndinni hér að neðan Simon þessi, sem er 36 ára gamall Svíi, hrósar sér af því að fylgja sömu pólitísku hugmyndafræði og Adolf Hitlers. Hann hefur afneitað Helförinni opinberlega og heldur því fram að samkynhneigð ýti undir barnagirnd.
Lindberg var dæmdur í þriggja mánaða fangelsi í Svíþjóð fyrir að hafa árið 2006 ásamt öðrum ráðist á félaga í hinsegin samtökunum RFSL og beitt þá ofbeldi. Í fyrra var Lindberg svo dæmdur fyrir hatursáróður gegn minnihlutahópum, fyrir að hafa í ræðu sem hann hélt í miðborg Stokkhólms árið 2016 kallað nasistkveðjuna „Sieg Heil“.
Á heimasíðu samtakanna segir að Norræna mótstöðuhreyfingin sé „byltingarkennd þjóðernis félagshyggin pólitísk baráttu samtök“. Þá segir einnig að meginmarkmið samtakanna sé að miðla áróðri.
„Meginverkefni samtakanna um þessar mundir er að miðla áróðri til fólksins. Okkar meginmarkmið með okkar áróðri er ekki einungis að ráða stóran hóp af fólki, heldur er það að draga til okkar hágæða, skarpa og hliðholla einstaklinga. Í stærra samhengi, notum við þennan áróður til að veita almenningi jákvæða ýmind af Norrænu mótstöðuhreyfingunni og þjóðernis félagshyggju, svo að almenningur mun fúslega styðja og á þeim degi er við náum völdum á Norðurlöndunum.“
Í bæklingi sem fólkið sem stendur nú á Lækjartorgi dreifa til vegfarenda segir meðal annars að fólki og landi sé stjórnað af sjálfskipaðri alþjóðaelítu sem hafi með gríðarlegu fjármagni náð stjórn á bönkum, fjölmiðlum og skemmtanaiðnaði í vestrænum samfélögum. „Þar af leiðandi hefur þeim tekist að halda fólkinu í járngreipum þrælavaxta, menningarmarxisma og úrkynjaðar ómenningar.“
Athugasemdir