Morgunblaðið tapaði 415 milljónum króna í fyrra

Árvakur hf., félagið sem gefur út Morg­un­blaðið, mbl.is og rekur útvarps­stöð­ina K100, var rekið með 415 milljón króna tapi árið 2018. Er það tölu­vert meira tap en árið 2017, þegar Árvakur tap­aði 284 millj­ónum króna.

Greint er frá þessu í Morg­un­blað­inu í dag. Kemur fram að afkoma fyrir afskriftir, fjár­magnsliði og skatta, EBITDA, hafi verið nei­kvæð um 238 millj­ónir króna. Tekjur juk­ust um 110 millj­ónir króna og voru 3,8 millj­arðar á árinu, en gjöld juk­ust meira, sér í lagi launa­kostn­aður. Er hann sagður skýra versn­andi afkomu milli ára.

„Ráðist hefur verið í umfangs­miklar aðgerðir til að hag­ræða í rekstri félags­ins og eru þær farnar að skila umtals­verðum árangri á síð­ustu mán­uðum,“ er haft eftir Haraldi Johann­es­sen, fram­kvæmda­stjóra Árvakurs og rit­stjóra Morg­un­blaðs­ins. „Engu að síður er rekstr­ar­um­hverfið enn erfitt, eins og ítrekað hefur komið fram í opin­berri umræðu. Sam­keppnin við Rík­is­út­varpið hefur orðið sífellt erf­ið­ari, en nei­kvæð umræða á vinnu­mark­aði, sem enn heldur áfram þó að stærstu aðilar á vinnu­mark­aðnum hafi samið, hefur auk stórra áfalla í atvinnu­líf­inu haft veru­lega nei­kvæð áhrif á aug­lýs­inga­mark­aði og þar með á rekstur fjöl­miðla.

Erfitt rekstr­ar­um­hverfi breytir því þó ekki að miðlar Árvakurs standa mjög sterkt um þessar mundir og ná augum og eyrum meira en níu af hverjum tíu lands­mönnum, sem gerir Árvakur að öfl­ug­asta fjöl­miðla­fyr­ir­tæki lands­ins. Og Árvakur hefur þrátt fyrir rekstr­ar­um­hverfið haldið áfram að ráð­ast í breyt­ingar og nýj­ungar til að bæta þjón­ustu við not­endur miðl­anna, nú síð­ast með miklum breyt­ingum á mbl.is eins og lands­menn sáu fyrir réttri viku.“

Eignir Árvakurs breytt­ust lítið milli ára, voru rúmir tveir millj­arðar króna í lok árs og var eig­in­fjár­hlut­fall rúm 28%. Í frétt­inni kemur fram að ákveðið hafi verið að ráð­ast í hluta­fjár­aukn­ingu til að treysta fjár­hags­stöðu félags­ins og að unnið sé við að ljúka henni um þessar mundir.

Útgáfu­fé­lag Morg­un­blaðs­ins tap­aði 284 millj­ónum króna árið 2017 og hefur blaðið alls tapað um tveimur millj­örðum króna frá því að nýir eig­endur, aðal­lega stór og fjár­sterk útgerð­ar­fé­lög, komu að blað­inu fyrir tíu árum síðan og Davíð Oddsson, fyrr­ver­andi for­maður Sjálf­stæð­is­flokks­ins, var ráð­inn rit­stjóri þess. Stærstu eig­endur félags­ins nú eru Eyþór Arnalds, odd­viti Sjálf­stæð­is­flokks í borg­ar­stjórn, auk aðila úr sjáv­ar­út­vegi.