Eigendur stærstu útgerðarfyrirtækja græddu hundruð milljóna í fyrra

Eigendur stærstu útgerð­ar­fyr­ir­tækja á Íslandi græddu hund­ruð millj­óna í formi sölu­hagn­aðar og arð­greiðslna í fyrra. Þetta sýnir álagn­ing­ar­skrá rík­is­skatt­stjóra sem gerð var aðgengi­leg í morgun. Stundin tók saman tekjur þeirra ein­stak­linga sem áttu stærsta hlut­deild í útgerð­ar­fyr­ir­tækj­unum sem hafa yfir mestum afla­hlut­deildum að ráða í fyrra, en sjá má tíu tekju­hæstu í töfl­unni hér að neðan.

Kristján Loftsson, oft kenndur við Hval hf., fékk fjár­magnstekjur upp á 160 millj­ónir, en þetta skýrist meðal ann­ars af sölu á hlut hans í HB Granda, stærsta útgerð­ar­fé­lagi lands­ins. 

Guð­mundur Krist­jáns­son í Brimi, sem keypti hlut í HB Granda fyrir 21,7 millj­arða í fyrra, var með mán­að­ar­laun upp á 3,1 milljón en aðeins 624 þús­und krónur í fjár­magnstekjur.

Á meðal útgerð­ar­eig­enda sem höfðu áber­andi miklar fjár­magnstekjur eru þrír stærstu eig­endur Skinn­eyjar Þinga­ness, þeir Ing­valdur Ásgeirs­son, Gunnar Ásgeirs­son og Ingólfur Ásgríms­son. Ing­valdur og Gunnar voru hvor um sig með 194 millj­ónir króna í heild­ar­árs­tekjur og Ingólfur með 148 millj­ónir.

Skilaði ekki skattframtölum og vantaldi milljarða

Þor­steinn Már Bald­vins­son, for­stjóri Samherja og hinn aðal­eig­andi útgerð­ar­veld­is­ins, græddi 50 millj­ónir í fjár­magnstekjur í fyrra og var með 4 millj­ónir í laun á mán­uði. Kristján Vil­helms­son, annar af aðal­eig­endum Samherja, greiddi hins vegar 102 millj­ónir króna í fjár­magnstekju­skatt og virð­ist þannig, við fyrstu sýn, hafa fengið 464 millj­ónir króna í  fjár­magnstekjur.

Hafa verður í huga að síðla árs 2017 komst yfir­skatta­nefnd að þeirri nið­ur­stöðu að Kristján þyrfti að borga end­ur­á­kvarð­aða skatta með 25 pró­senta álagi vegna skatta­laga­brota, en Kristján hafði ekki skilað skatt­fram­tölum um ára­bil og van­talið millj­arða. Kann þetta að hafa haft áhrif á skatt­greiðslur hans í fyrra.

Græddi á sölu Icelandic Iberica

Útgerð­ar­mað­ur­inn Jakob Valgeir Flosason var með fjár­magnstekjur upp á 75,7 millj­ónir króna. Jakob var á meðal þeirra sem græddu umtals­vert á sölu spænska fyr­ir­tæk­is­ins Icelandic Iberica til Icelandic Seafood International síð­asta sumar. Við­skipta­blaðið fjall­aði um söl­una og greindi frá því að fjár­festa­hóp­ur­inn sem keypti Icelandic Iberica árið 2016 fengi nær sjö millj­örðum meira fyrir fyr­ir­tækið en þeir lögðu til þegar það var keypt.

Ingi Jóhann og Anna Guð­munds­börn

Mynd: Af vef Síld­ar­vinnsl­unnar

Aðrir í hópi tekju­hæstu útgerð­ar­eig­enda lands­ins eru systk­inin Ingi Jóhann Guð­munds­son og Anna Guð­munds­dóttir, hvort um sig með heild­ar­árs­tekjur upp á rúm­lega 90 millj­ónir króna.

Ingi og Anna eru stærstu eig­endur útgerð­ar­fyr­ir­tæk­is­ins Gjögurs og jafn­framt stærstu eig­endur Kjálka­ness ehf. sem á 34 pró­senta hlut í Síld­ar­vinnsl­unni. Hagnaður Gjögurs nam 517 millj­ónum króna í fyrra, nær tvö­fald­að­ist, en fyr­ir­tækið seldi meðal ann­ars rekstr­ar­fjár­muni og kvóta fyrir meira en millj­arð.