Stuðningsfólk ríkisstjórnar Katrínar Jakobsdóttur notast við sama textann í umræðum um þriðja orkupakkann  á mismunandi Facebook-síðum. Textinn birtist fyrst, svo eftir væri tekið, að kvöldi 28. maí síðastliðins á Facebook-síðu Ólafs Teits Guðnasonar, aðstoðarmanns Þórdísar Kolbrúnar Reykfjörð Gylfadóttur, ferðamála-, iðnaðar og nýsköpunarráðherrra og dómsmálaráðherra. Síðan þá hefur textanum verið dreift víðar í rökræðum milli stuðningsfólks og andstæðinga þriðja orkupakkans.

Textann birti Ólafur Teitur sem viðbragð við skrifum Arnars Þórs Jónssonar, dómara við Héraðsdóm Reykjavíkur, en Arnar Þór lýsti þeirri skoðun sinni að einhliða fyrirvarar sem íslensk stjórnvöld hyggðust setja myndu enga þýðingu hafa komi til þess að fjárfestar vilji leggja sæstreng á milli Íslands og Evrópu. Textinn sem Ólafur Teitur birti var eftirfarandi:

„Mér sýnist hér gæta misskilnings. Fyrivararnir [svo] lúta að heimildum ESA til að taka ákvarðanir um skilyrði og skilmála fyrir flutningi raforku þegar millilandatenging er til staðar. Þau ákvæði munu ekki eiga við nema við ákveðum að tengjast. Ekkert í 3ja orkupakkanum hróflar á nokkurn hátt við því að leyfisveitingin er sjálfstæð ákvörðun Íslendinga, eins og staðfest hefur verið af sjálfum framkvæmdastjóra orkumála ESB. Fyrirvörunum er ekki ætlað að hindra málsókn eins og þarna er haldið fram eða amk gefið í skyn. Það getur auðvitað hver sem er farið í mál ef honum sýnist svo. Valdheimildir ESA ná hins vegar ekki til ákvörðunar um að leggja strenginn, það liggur alveg fyrir. Ef menn telja sig geta knúið íslenska ríkið til að tengjast sæstreng þá hefur sú hætta verið fyrir hendi í 25 ár án þess að neinn hafi velt því fyrir sér eða talið það áhyggjuefni. Þriðji orkupakkinn breytir nákvæmlega engu þar um. Vangaveltur um að svo væri kallaði Skúli Magnússon héraðsdómari og dósent við lagadeild HÍ "lögræðilega loftfimleika" á fundi með utanríkismálanefnd Alþingis. Ekki eitt einasta dæmi er til um það að EES-ríki hafi verið þvingað til að tengjast streng gegn vilja sínum. Vangaveltur um að einn dýrasti og lengsti strengur heims verði sá fyrsti þar sem slíkt gerist - strengur sem auk þess hefur verið sýnt fram á að borgar sig ekki á markaðslegum forsendum - það mætti þá kannski kalla slíkar vangaveltur loftfimleika fyrir lengra komna.“

Textanum dreift og með stafsetningarvillu

Á Facebook-síðu Arnars Þórs, þar sem hann birti skoðun sína að kvöldi 27. maí, spunnust all nokkrar umræður um málið. Þorkell Sigurlaugsson athafnamaður skrifaði þar athugasemd að kvöldi 28. maí. Fyrri hluti þeirrar athugasemdar var orðrétt sá sami og Ólafur Teitur hafði skrifað á sína síðu örskömmu fyrr. Þorkell er formaður velferðarnefndar Sjálfstæðisflokksins og situr einnig í allsherjar- og menntamálanefnd sama flokks.

Frosti Sigurjónsson, fyrrverandi Alþingismaður og einn forsvarsmanna Orkunnar okkar, birti sama kvöld, 28. maí, hlekk á frétt um skrif Arnars Þórs á Facebook-síðu sinni. Upp úr miðnætti skrifaði Bergþóra Benediktsdóttir athugasemd við færslu Frosta. Athugasemd Bergþóru var orðrétt sú sama og fyrri hluti texta Ólafs Teits. Bergþóra er aðstoðarkona Katrínar Jakobsdóttur forsætisráðherra.

Þá birti Kristinn Karl Brynjarsson, 2. varaformaður verkalýðsráðs Sjálfstæðisflokksins texta Ólafs Teits í heild sinni, óbreyttan, sem eigin athugasemd á síðu Halls Hallssonar fjölmiðlamanns, í umræðum um þriðja orkupakkann.

Athygli vekur að í öllum tilfellum er sama stafsetningarvillan í textanum, nefnilega að stafinn r vantar í orðið „fyrivararnir“ í upphafi annarar setningar í textanum. Því má vera ljóst að stuðningsmenn ríkisstjórnarinnar eru að dreifa sama textanum, sem sínum eigin, í mismunandi umræðum.