Rafbílavæðing og sparneytnari bifreiðar duga ekki til að Reykjavíkurborg nái markmiðum sínum í loftslagsmálum. Draga þarf úr akstri um allt að 50% til að mæta markmiðum Parísarsamkomulagsins fyrir árið 2030.

Fréttablaðið fjallar í dag um minnisblað sérfræðingahóps HR og HÍ um mat á losun gróðurhúsalofttegunda á höfuðborgarsvæðinu. Minnisblaðið var lagt fram á fundi skipulags- og samgönguráðs í vikunni og vilja fulltrúar meirihlutans nota það sem grundvöll stefnumótunar. Fulltrúar Sjálfstæðisflokksins töluðu fyrir aukinni rafbílavæðingu.

„Kjarni málsins er að núverandi plön um breytingar á skattkerfinu sem tengjast rafbílavæðingu og nú eru á borðinu, ef við skoðum vænta aukningu í rafbílum miðað við þær forsendur, duga ekki til,“ segir Brynhildur Davíðsdóttir, prófessor í umhverfis- og auðlindafræði, einn sérfræðinganna sem unnu minnisblaðið.

„Við þurfum einnig að hafa áhrif á ferðahegðun fólks. Gera fólki kleift að nota almenningssamgöngur, ganga, hjóla en ekki síður velta með markvissum hætti fyrir okkur skipulaginu. Hvað getum við gert til að draga úr ferðaþörf með einkabílnum?“

Brynhildur bendir á að fólk þurfi ekki að hætta að nota einkabílinn, heldur nota hann öðruvísi. Skipuleggja þurfi hverfi þannig að hann þurfi síður til að sækja þjónustu. Ísland eigi að vera í fararbroddi um metnaðarfullar aðgerðir, sem verði ódýrari ef ekki verður ráðist í þær of seint.