Hæstiréttur kveður upp dóm kl. 9 í fyrramálið í máli Glitnis HoldCo gegn Stundinni og Reykjavík Media. Málflutningur fyrir hæstarétti fór fram í síðustu viku.

Hæstiréttur tilkynnti málsaðilum í nóvember að lögbann á fréttaflutning Stundarinnar og Reykjavík Media sem byggði á gögnum úr Glitni væri fallið úr gildi og Glitnir HoldCo gæti ekki lengur krafist þess að lögbannið yrði staðfest með dómi. Hins vegar féllst Hæstiréttur á að veita Glitni HoldCo áfrýjunarleyfi að því er varðar kröfu um að viðurkennt verði að fjölmiðlunum sé óheimilt að byggja á gögnunum í fréttaflutningi og beri að afhenda gögnin.

Bæði héraðsdómur og Landsréttur töldu lögbannið hafa „raskað grundvallargildum tjáningarfrelsisins og rétti einstaklinga til að taka við upplýsingum og mynda sér skoðun á samfélgslegum málefnum“. Þann 26. október síðastliðinn, áður en áfrýjunarfrestur rann út, hélt Stundin áfram umfjöllun á grundvelli Glitnisgagnanna. Nokkrum dögum síðar leitaði Glitnir HoldCo leyfis Hæstaréttar til að áfrýja dómi Landsréttar.

Málið varðar umfjöllun sem birtist á vef og blaði Stundarinnar dagana 6. til 16. október síðastliðinn og unnin var í samstarfi við breska dagblaðið The Guardian og Reykjavik Media. Um var að ræða ítarlegar fréttaskýringar um viðskipti Bjarna Benediktssonar, þáverandi forsætisráðherra, og fjölskyldu hans í kringum bankahrunið 2008. 

Kom meðal annars fram að Bjarni Benediktsson hefði selt allar eignir sínar í Sjóði 9 hjá Glitni dagana 2. til 6. október 2008 og að faðir hans hefði verið leystur undan sjálfskuldarábyrgð hjá bankanum skömmu fyrir hrun. Þá greindi Stundin frá því

að Bjarni hefði verið losaður undan 50 milljóna kúluláni sem hann hafði tekið persónulega hjá Glitni og skuldin færð yfir á eignarhaldsfélag föður hans, Hafsilfur ehf. 

Fyrirvari: Fjölmiðillinn Stundin er aðili að málinu sem hér er fjallað um.