Skattatillögur ríkisstjórnarinnar eru skref í rétt átt fyrir tekjulága hópa en „skerð[a] ekki hár á höfði eignafólks og arðræningja“. 

Þetta fullyrða Vinstri græn í Suðurkjördæmi á Facebook, en um er að ræða eins konar upplýsingasíðu þar sem fulltrúar flokksins deila efni með fylgjendum sínum, einkum Ari Trausti Guðmundsson sem er eini þingmaður Vinstri grænna í kjördæminu.

Mynd: Skjáskot af Facebook

„Nokkur skref í áttina fyrir tekjulaga hópa en skerðir ekki hár á höfði eignafólks og arðræningja, enda varla að vænta þess meðan Sjálfstæðisflokkurinn ræður efnahags og fjármálaráðuneytinu,“ segir í færslunni um skattatillögur ríkisstjórnarinnar.

Samkvæmt tillögunum verður nýju lágtekjuskattþrepi bætt við í tekjuskattskerfinu og fyrirkomulagi persónuafsláttar breytt þannig þróun hans miðist við nýja vísitölu verðlags og framleiðniaukningar.

Bjarni Benediktsson fjármálaráðherra hefur fagnað því sérstaklega að „ekki sé verið að hækka skattbyrðina neins staðar“ en eins og bent er á í frétt Stundarinnar í dag eru áform ríkisstjórnarinnar um að girða fyrir samnýtingu skattþrepa í raun ígildi um 3 milljarða skattahækkunar sem lendir að mestu á tekjuhæstu fjölskyldum landsins.

Uppfært kl. 17:

Þorvaldur Örn Árnason hefur gengist við því að hafa skrifað umrædd ummæli. „Ég vil taka fram, af gefnu tilefni, að svohljóðandi færsla í upphafi þessa þráðar er mín eigin; "Jú, nokkkur skref í áttina fyrir tekjulaga hópa en skerðir ekki hár á höfði eignafólks og arðræningja, enda varla að vænta þess meðan Sjálfstæðisflokkurinn ræður efnahags og fjármálaráðuneytinu." Ég sjálfur á meira að segja líka prentvilluna í "nokkkur"! Mér urðu á þau mistök að skrifa þetta í nafni síðunnar, "Vinstri græn í Suðurkjördæmi", en þetta er mín prívat skoðun - og ég stend við hana hvenær sem er og hvar sem er!“ skrifar hann á Facebook. „Ég get hins vegar ekki mælt fyrir munn allra Vinstrigærnna í Suðurkjördæmi, og þykir miður að Stundin hafa skilið færsluna þannig. Kjördæmisráð VG í Suðurkjördæmi gæti mælt fyrir munn allra, en það hefur mér vitandi ekki enn komið saman á þessu ári.“