Lögreglan hefur fengið gögn í hendur um Procar

Miðlæg deild lög­regl­unnar á höf­uð­borg­ar­svæð­inu hefur mál­efni bíla­leig­unnar Procar til skoð­unar. Þetta stað­festir Karl Steinar Valsson yfir­lög­reglu­þjónn í sam­tali við Stundina. Lög­regl­unni hafa borist gögn varð­andi fyr­ir­tækið í tengslum við frétta­flutn­ing af því hvernig kíló­metra­mælum bíla þess hefur verið breytt og staða þeirra fölsuð.

„Við fengum ákveðin gögn í hend­urnar tengd þessu sem við erum bara að byrja að rýna. Það er á algjöru frum­stigi, skoðun á mál­inu. Við höfum auð­vitað fylgst með frétta­flutn­ingi af mál­inu og munum skoða það,“ segir Karl Steinar.

Jón Trausti Ólafsson, for­maður Bíl­greina­sam­bands­ins sem hefur innan sinna vébanda bíla­sölur, segir mál Procar alvar­legt. „Það þarf að skoða þetta ofan í kjöl­inn og við lítum þetta mjög alvar­legum augum. Þarna er verið að beita aðferðum sem stand­ast ekki eðli­lega við­skipta­hætti og eru órétt­mætar.“

„Ég von­ast til að þetta sé ein­stakt til­vik“

Spurður hvort ástæða sé til að ótt­ast að aðferðir Procar séu ekki eins­dæmi og tíðk­ist hjá öðrum bíla­leigum seg­ist Jón Trausti vona að svo sé ekki. „Ég von­ast til að þetta sé ein­stakt til­vik. Ég veit að í bíla­leigu­starf­sem­inni er mikð af heið­ar­legu og góðu fólki og ég trúi því að þetta sé ekki við­tekin venja ann­ars staðar. Við hjá Bíl­greina­sam­band­inu munum fylgj­ast vel með mál­inu og sjá hvernig það þró­ast.“

Bíla­leigu­nefnd Samtaka ferða­þjón­ust­unnar fund­aði í dag vegna máls­ins, en bíla­leigur starfa undir hatti sam­tak­anna. Gunnar Valur Sveins­son, verk­efna­stjóri hjá sam­tök­unum, sagði þegar Stundin náði tali af honum á fjórða tím­anum að verið væri að vinna úr þeim upp­lýs­ingum sem fram hefðu komið á fund­inum og búast mætti við til­kynn­ingu síðar í dag. Aðspurður hvers efnis sú til­kynn­ing yrði vildi Gunnar Valur ekk­ert gefa frekar upp um það.