Ingibjörg Pálmadóttir, eigandi Torgs ehf. sem gefur út Fréttablaðið, kemur fram í viðtali í Fréttablaðinu í dag. Ekki er tilgreint hver höfundur viðtalsins er, en umfjöllunarefnið er staða kvenna á vinnumarkaði og reynsla Ingibjargar af því að vera kona í stjórnunarstöðu. Þá gagnrýnir hún fjölmiðla fyrir að láta að því liggja að hún sé „einhvers konar hliðarsjálf“ eiginmanns síns, Jóns Ásgeirs Jóhannessonar.
Jón Ásgeir var einnig viðmælandi Fréttablaðsins í grein eftir ritstjóra þess, Ólöfu Skaftadóttur, sem birtist á dögunum. Þar var fjallað um tillögu 365 hf. og annarra smærri hluthafa í Högum þess efnis að kosningar til stjórnar færu fram með margfeldiskosningu. Jón Ásgeir var á meðal frambjóðenda til stjórnar Haga en náði ekki kjöri. Hann veitir fjölmiðlum sjaldan viðtöl, en í frétt Ólafar lýsti hann nauðsyn þess að „vernda minni hluthafa“ í Högum og sagði margfeldiskosningu vera lýðræðislegasta kosningakerfið sem hlutafélagalög byðu upp á.
Ólöf Skaftadóttir er dóttir Kristínar Þorsteinsdóttur, útgefanda Fréttablaðsins og fyrrverandi verkefnastjóra hjá Baugi sem hefur ítrekað skrifað leiðara þar sem fundið er að meðferð rannsóknaraðila, réttarkerfis og fjölmiðla á Jóni Ásgeiri og viðskiptafélögum hans. Bróðir Ólafar, Jón Skaftason, hefur unnið fyrir Jón Ásgeir og stýrt félaginu Tailor Holding ehf. sem er meðal annars í eigu félags Ingibjargar Pálmadóttur, og jafnframt komið að aflandsviðskiptum Ingibjargar og Jóns Ásgeirs í gegnum félagið Guru Invest sem var í Panamaskjölunum og Stundin fjallaði um árið 2016. Ingibjörg Pálmadóttir er eigandi Guru Invest en athygli vekur að Jón Ásgeir var með prókúruumboðið fyrir fyrirtækið í Panama eftir að það var stofnað árið 2007 og gat þannig tekið ákvörðun um að skuldbinda félagið án þess að eiga það.
Í viðtalinu við Ingibjörgu Pálmadóttur í dag kemur fram að konur séu áberandi í stjórnunarstöðum fyrirtækja í hennar eigu. Bent er á að útgefandi Fréttablaðsins sé kona og jafnframt annar tveggja ritstjóra blaðsins, fjármálastjórinn og framkvæmdastjóri rekstrarsviðs. Þá séu hótelstjórinn, aðstoðarhótelstjórinn og veitingastjórinn á 101 hótel, í eigu Ingibjargar, allar kvenkyns.
Ingibjörg segist ekki hafa farið varhluta af því að vera kona í karllægum heimi atvinnulífsins. „Það er til dæmis þannig að þegar er fjallað um fyrirtæki í minni eigu er gjarnan látið að því liggja að ég sé einhvers konar hliðarsjálf eiginmanns míns. Það er frekar súrt. Þótt ég sé kona, þá á ég nefnilega þau fyrirtæki sem eru skráð í minni eigu,“ segir hún. „Þetta hefur sérstaklega verið erfitt fyrir ákveðna fjölmiðla að skilja, Ríkisútvarpið og svo nokkra smámiðla sem Ríkisútvarpið svo hampar, að ég hafi skoðanir og jafnvel úrslitavald um eigin rekstur. Þetta fer alveg nett í taugarnar á mér, að ég hafi orðið að einhvers konar viljalausu verkfæri þegar ég gifti mig tæplega fimmtug og missti greinilega sjálfræði og allar mínar eignir um leið. Mér fannst það alveg merkilegt að maðurinn minn varð ekki eignalaus við ráðahaginn eins og ég. (…) Það breytir því ekki að maðurinn minn er minn besti samstarfsfélagi, bæði í leik og starfi. Hann er mjög hrifinn af kvennaveldinu í kringum okkur.“
Þá víkur hún að málarekstri skilanefndar Glitnis gegn sér: „Steinunn Guðbjartsdóttir, sem var formaður skilanefndar Glitnis, gekk meira að segja svo langt að lögsækja mig fyrir dómstólum fyrir að vera hliðarsjálf eiginmanns míns. Megi hún hafa ævarandi skömm fyrir. Skemmst frá því að segja að það dómsmál var látið niður falla.“
Hér má lesa viðtalið í heild.
Fjölmiðlamál
Öll stærri einkarekin fjölmiðlafyrirtæki rekin með tapi fyrir greiðslu fjölmiðlastyrkja
Hundruð milljóna taprekstur fjölmiðla telst ekki til fjárhagserfiðleika
Kolbrún og Kristín óska eftir rökstuðningi frá RÚV
Tengja uppsagnir hjá Morgunblaðinu við kjarabaráttu: „Þér kemur einfaldlega ekkert við hvað ég er með í laun“
Eyþór Arnalds: „Ósæmilegt að segja að Samherji sé einhvers konar mútufélag“
Athugasemdir