Stjórn Flokks fólks­ins hefur skorað á Ólaf Ísleifs­son og Karl Gauta Hjalta­son, þing­menn flokks­ins, að segja af sér þing­mennsku ásamt öðrum trún­að­ar­störfum fyrir flokk­inn. Þetta kemur fram í til­kynn­ingu sem Inga Sæland sendi út.

„Stjórn Flokks fólks­ins sam­þykkir ein­róma að skora á alþing­is­menn­ina Ólaf Ísleifs­son og Karl Gauta Hjalta­son að segja af sér þing­mennsku ásamt öðrum trún­að­ar­störfum fyrir flokk­inn. Stjórn flokks­ins kemur saman á ný á morgun, 30. nóv­em­ber klukkan 14:00, þar sem næstu skref verða tekin.

Fyrir hönd stjórnar flokks­ins,

Inga Sæland for­maður Flokks fólks­ins.“

Bergþór Ólason, þing­maður Mið­flokks­ins, kall­aði Ingu Sæland, for­mann Flokks fólks­ins „húrr­andi klikk­aða kuntu“ á hljóð­upp­töku af setu þing­manna á Klaustur bar 20. nóv­em­ber sem Stundin hefur undir höndum. Orða­skiptin voru mjög hávær, áttu sér stað í vitna við­ur­vist og náð­ust að hluta á upp­tök­una.

„Hún er fokk­ing tryllt,“ sagði Bergþór við Karl Gauta Hjalta­son og Ólaf Ísleifs­son, þing­menn Flokks fólks­ins, í við­ur­vist flokks­fé­laga sinna, Sig­mundar Davíðs Gunn­laugs­sonar, Önnu Kol­brúnar Árna­dóttur og Gunnars Braga Sveins­sonar. Reyndu þing­menn Mið­flokks­ins að fá Ólaf og Karl Gauta til að skipta um flokk.

„Hún getur þetta ekki. Hún getur talað um þetta, hún getur grenjað um þetta, en hún getur ekki stjórnað,“ sagði Karl Gauti.

Athygli vekur að Ólafur Ísleifs­son og Karl Gauti komu Ingu Sæland nær ekk­ert til varnar en hlust­uðu þöglir á þing­menn Mið­flokks­ins úthúða henni. „Hún vill vel,“ sagði Ólafur Ísleifs­son í eitt skiptið en að öðru leyti tók hann undir með Karli Gauta um að hún væri ófær um að gegna for­mennsku í Flokki fólks­ins.

Karl Gauti brást við í yfir­lýs­ingu sem hann sendi fjöl­miðlum „Ég harma ummæli sem ég lét falla á veit­inga­stað fyrir stuttu síðan og hafa birst í nokkrum fjöl­miðlum. Af því til­efni vil ég taka fram að ég er ekki á förum úr Flokki fólks­ins, styð stefnu flokks­ins og ber traust til for­manns hans, Ingu Sæland.“