Vinnu lauk við gerð krabba­meins­á­ætl­unar fyrir heil­brigð­is­ráðu­neytið árið 2016, en áætl­unin var aldrei sett í gang. Gild­is­tími hennar var til 2020 en verk­efna­stjórn hefur aldrei komið saman. Þetta kemur fram í Frétta­blað­inu í dag.

Krabba­meins­á­ætl­anir eru algengar í Evrópu og hafa verið inn­leiddar á öllum Norð­ur­löndum nema Íslandi. Vinna við íslensku áætl­un­ina hófst 2011 og tók hún fimm ár, með aðkomu helstu sér­fræð­inga í mála­flokknum. Krabba­meins­á­ætl­anir miða að því að fækka nýgrein­ingum krabba­meina, draga úr dán­ar­tíðni vegna þeirra og bæta lífs­gæði ein­stak­linga með krabba­mein með for­vörnum og með­ferð.

„Þetta er bara sorg­legt að svona vinnu skuli daga uppi en því miður er þetta of algengt þegar lagt er af stað í svona mikla vinnu í litlu sam­fé­lagi sem er van­burða til að taka heild­stæða áætlun og vinna úr,“ segir Ófeigur Tryggvi Þor­geirs­son, læknir og for­maður hóps­ins sem vann áætl­un­ina, í við­tali við Frétta­blaðið.

Ófeigur segir áætl­un­inni hafa verið stungið í skúffu. „Við Íslend­ingar erum ekki góðir í að inn­leiða áætl­anir. Ég held að það sé marg­búið að sanna þá stað­reynd að það er ekki okkar styrk­leiki,“ segir Ófeigur.

Krabba­mein er að verða algeng­asta dán­ar­or­sök Íslend­inga með hækk­andi aldri, en um 1.500 manns grein­ast árlega. Þriðja hver mann­eskja grein­ist með krabba­mein á lífs­leið­inni og hefur sjúk­dóm­ur­inn mikil áhrif á fjöl­skyldur þeirra sem grein­ast.

Ástrós Rut Sig­urð­ar­dóttir, for­maður Krafts, stuðn­ings­fé­lags fyrir ungt fólk sem greinst hefur með krabba­mein og fyrir aðstand­endur, segir að erfitt sé að kom­ast í gegnum frum­skóg kerf­is­ins eftir grein­ingu. Kallar hún eftir stofnun emb­ættis umboðs­manns sjúk­linga til að styðja við krabba­meins­veika og aðstand­endur.