Ásmundur Friðriksson, þingmaður Sjálfstæðisflokksins, hélt tilfiningaþrungna ræðu á þingi í dag þar sem hann sakaði fjölmiðla um að ganga erinda Pírata og sagði þá hafa flugumenn á sínum snærum við að bera út óhróður um hann.

Tilefni ræðu Ásmundar var að greint var frá því í fjölmiðlum í gær að hann hefði sagt á Alþingi að „SS-menn“ að sunnan kæmu í veg fyrir framfarir á Vestfjörðum, vegna þess að úrskurðarnefnd umhverfis- og auðlindamála hefði synjað laxeldi í Patreksfirði og Tálknafirði um starfsleyfi á grundvelli umhverfissjónarmiða.

Ásmundur sagðist í dag hafa ruglast. Hann hefði skrifað á minnisblað sitt „SS“, sem skammstöfun fyrir „sérfræðingar að sunnan“, en óvart lesið það upp. „Ég sagði óvart SS-sveitin. Sérfræðingarnir að sunnan. Það fannst mér mjög miður. Og hafi ég ætlað að vera með eitthvað gáttlæti í huga á þessari stundu, sem var mjög alvarleg, að þá var það ekki svo. En það stóð ekki á viðbrögðunum. Píratarnir stóðu hér upp og fóru að bendla mig við stormsveitir þriðja ríkisins. Og það er eins og þegar þeir tala um mig í þessum sal, að það er eins og bóndi blístri á hlíðinn smalahund, þegar Stundin og Kjarninn, í þessu tilfelli, og oftast Ríkisútvarpið, taka upp eftir þeim það sem ég mismælti mig hér í gær. Og þeir fara að bera mig saman við þessa morðóðu hunda frá Þýskalandi.“

Þess ber að geta að fullyrðing Ásmdunar um að Stundin hafi fjallað um ummæli hans í gær, er röng.

Dró orð sín til baka

Kjarninn fjallaði hins vegar um ummæli Ásmundar í frétt í gær,  sem og gagnrýni píratans Smára McCarthy á líkingu við sérsveitir nasista, sem gengu undir nafninu SS-sveitir.  Smári steig upp í pontu og brást við orðum Ásmundar á þingi í gær: „Ég kem aðallega til að gera athugasemd við það að hv. þingmaður skuli líkja stofnunum sem eru mikilvægar samfélaginu, og eru vissulega sumar með höfuðstöðvar í Reykjavík, við stormsveitir nasista sem stóðu að miklum morðum og ódæðum í seinni heimsstyrjöld. Mér finnst það ósmekklegt þar sem annað er lagalaus skríll sem drap fólk og hitt eru stofnanir sem eru mikilvægar samfélaginu og voru stofnaðar til að framfylgja lögum sem voru sett í þessum sal. Mér þykir full ástæða til að biðja hv. þingmann um að draga þau tilteknu orð til baka svo að við getum rætt málið á eðlilegum grundvelli.“

Svo fór í gær að Ásmundur dró orð sín til baka og áréttaði: „Það er hárrétt hjá háttvirtum þingmanni að það var algjörlega ósæmilegt að minnast á þetta á þennan hátt. Það var heldur ekki meint þannig. Ég var að tala um sérfræðingana að sunnan og skammstafaði það þannig. Ég vil taka skýrt fram að ég ætlaði ekki að höggva í sama knérunn og átti alls ekki von á því að sú mynd yrði dregin upp af umræðu minni, ég ætla ekki einu sinni að nefna það á nafn af því það er ekki minn háttur.“

„Svo hafa þeir flugumenn úti í bæ“

Ásmundur fullyrti í ræðu sinni í dag að ekki væri fjallað um að pírati hefði sagt Piu Kjærsgaard, forseta danska þingsins, hafa „sömu skoðanir og Adolf Hitler“.

„Mér finnst þetta fyrir neðan allar hellur.“

Hann fullyrti auk þess að flugumenn væru á ferli sem dreifðu óhróðri um hann. „Mér finnst þetta fyrir neðan allar hellur. Sömu aðilar tala um þjóðhöfðingja vestrænna ríkja, sem kosnir eru af fólkinu, og líkja þeim við Mussolini og þennan títtnefnda Adolf Hitler. Og svo hafa þeir alls konar flugumenn úti í bæ sem bera ófögnuðinn út um mann. Þetta er fólkið sem stendur upp í þessum sal, trekk í trekk, ber upp á mann lygar, hefur sagt að ég væri þjófur, hafi stolið peningum af þinginu, og þau þurfa ekki að standa fyrir neinu. Og svo hafa þeir flugumenn úti í bæ, sem senda ósómann yfir mann, sem taka ósómann úr fjölmiðlunum og senda yfir mann . Á fésbókinni og víðar. Mér finnst bara að þetta sé óboðlegt fyrir þingið að það skuli vera talað svona um þingmenn, að þeir séu SS-menn.“

Ásmundur hefur sætt gagnrýni vegna rangra fullyrðinga hans um kostnað við móttöku hælisleitenda. Einnig hefur hann lagt til að bakgrunnur allra múslima á Íslandi verði kannaður með tilliti til þess að hætta sé á að þeir séu hryðjuverkamenn. Þá hefur Ásmundur verið til umfjöllunar í fjölmiðlum eftir að í ljós kom að hann hefði innheimt 4,6 milljónir króna í akstursgreiðslur frá Alþingi, vegna aksturs sem samkvæmt Félagi íslenskra bifreiðaeigenda kostaði hann að raunvirði aðeins rúmar tvær milljónir króna.

Ásakaði formann velferðarnefndar

Ásmundur hefur áður gagnrýnt fjölmiðla á Alþingi og sagði meðal annars í ræðustól á þingi að hann hefði „ekki miklar mætur“ á Stundinni. Áður hafði Stundin fjallaði um að hann hefði svarað fjöldapósti vegna boðunar fundar um barnaverndarmál í velferðarnefnd Alþingis, sem hann á sæti í, með þeim orðum að hann myndi sleppa fundinum, með þeirri skýringu að málið sem um ræddi hefði verið til umfjöllunar í Stundinni: „Ég verð ekki á þessum fundi og ég les ekki Stundina, en er það fjölmiðill sem fólk tekur mark á aðrir en Píratar. Bkv Ási Friðriks.“ Þá sakaði hann formann nefndarinnar, Halldóru Mogensen, þingmann pírata, um að „mígleka“ upplýsingum til Stundarinnar, vegna birtingar tölvupóstins, en nokkur fjöldi fólks fékk viðkomandi tölvupóst fyrir utan Halldóru, sem hafnaði alfarið ásökunum Ásmundar.

Fyrirvari um hagsmuni: Fjölmiðillinn Stundin, sem flytur þessa frétt, kemur fyrir í orðum þingmannsins sem fjallað er um.