Valur Lýðsson hefur verið dæmdur til sjö ára fangelsisvistar fyrir að hafa orðið bróður sínum, Ragnari Lýðssyni, sem átti sér stað þann 31. mars síðastliðinn. Einnig er hann dæmdur til að greiða börnum Ragnars þrjár milljónir króna í miskabætur, en Ragnar átti fjögur uppkomin börn.

Aðalmeðferð í málinu hófst 27. ágúst þar sem fjöldi vitna fluttu framburð sinn fyrir dómi, þar á meðal björgunarsveitarmenn frá Flúðum sem voru fyrstir á vettvang. Valur hringdi á Neyðarlínuna þegar hann kom að Ragnari látnum um morguninn, og var hann handtekinn skömmu síðar.

Ummerki á staðnum bentu til þess að átök hefðu átt sér stað og að vegið hefði veriðð að Ragnari með höggum og spörkum. Kolbrún Benediktsdóttir saksóknari sagði að mati ákæruvaldsins væri sekt Vals sönnuð. Krafðist hún sextán ára fangelsis fyrir verknaðinn. 

Dómari dæmdi Val fyrir líkamsárás sem leiddi Ragnar til dauða. 

Bar við minnisleysi

Valur hélt fram minnisleysi við atburðinn vegna mikillar ölvunar. Þeir sátu ásamt þriðja bróður sínum Erni við drykkju að kvöldi föstudagsins langa. Sterkt áfengi hafi verið í boði sem Valur kaus að drekka í tilefni heimsóknar bræðranna, þrátt fyrir að hafa gefið upp drykkju þrem mánuðum áður, að eigin sögn. 

Örn fór upp í rúm um tíuleytið en Ragnar og Valur héldu áfram að drekka og spjalla. Þegar Valur lýsti yfir áformum sínum um að færa bæjarstæðið á Ragnar að hafa brugðist illa við, en Valur segist ekki muna meira. Hann hafi vaknað morguninn eftir grunlaus um að eitthvað hafi gerst og fundið Ragnar látinn í þvottahúsinu.

Mismunandi framburður Vals

Í símtali við Neyðarlínuna sagði Valur hins vegar að þeir bræðurnir hefðu tekist á eftir að Ragnar varð brjálaður. Engin frekari útskýring var gefin á því, en þar kom fram að á meðal þess sem bar á góma var lán sem Ragnar hefði fengið hjá Val, ásamt hugmyndum Vals um að færa bæjarstæðið. Ragnar hefði brugðist illa við þessum umræðum. 

Þessi vitnisburður breyttist samdægurs við yfirheyrslu lögreglu. Í kjölfarið hefur Valur haldið fram sama vitnisburði, að hann muni ekkert eftir atburðinum, fyrir utan reiðilegt andlit Ragnars sem glefsist upp í minnisleysinu, en hverfi svo. Lögreglan sagði að vitnisburðurinn væri ótrúverðugur og hvorki í samræmi við símtal Vals við Neyðarlínuna né verksummerki. 

Sérfræðingar hafa haldið því fram að Valur sýni engin merki um vitglöp eða neitt sem skýrir minnisleysi hans. 

Bæði Valur og Örn voru handteknir, en Örn látinn laus eftir skýrslutöku. Valur sat í gæsluvarðhaldi allt þangað til dómur féll. Örn kaus að gefa ekki skýrslu fyrir dómi við aðalmeðferð málsins.