Heiða Björg Pálmadóttir, starfandi forstjóri Barnaverndarstofu, fullyrðir að Barnaverndarstofa hafi ekki vitað af fréttaflutningi Stundarinnar um afskipti Braga Guðbrandssonar af Hafnarfjarðarmálinu svokallaða þegar stofnunin afhenti RÚV og Stundinni hundruð blaðsíðna af gögnum um einstök barnaverndarmál og umgengnisdeilur foreldra. Persónuvernd hefur nú til skoðunar hvort gagnaafhendingin hafi falið í sér lögbrot, en Barnaverndarnefnd Reykjavíkur kærði forstjóra Barnaverndarstofu til lögreglu fyrr í sumar.

RÚV fékk gögnin mánudaginn 30. apríl 2018 og Stundin miðvikudaginn 2. maí. Dagana á undan hafði ríkt eins konar fjölmiðlafár í kjölfar ítarlegrar umfjöllunar Stundarinnar þann 27. apríl um afskipti Braga Guðbrandssonar af barnaverndarmáli í Hafnarfirði. Í fréttinni var rakið hvernig Bragi beitti sér fyrir því að börn yrðu látin umgangast föður sinn þrátt fyrir viðvörunarorð og áhyggjur barnaverndarnefndar og meðferðaraðila af meintum kynferðisbrotum. Bragi viðurkenndi í viðtali við Stundina að hann hefði ekki viljað vita hvort faðirinn hefði hugsanlega brotið gegn börnum sínum og ekki haft aðgang að gögnum málsins þegar hann hlutaðist til um meðferð þess hjá barnaverndarnefnd.

Málið var tekið upp í öðrum fjölmiðlum, félagsmálaráðherra fenginn í Kastljós, yfirlýsingar sendar út og velferðarnefnd kölluð saman. Forstjóri Barnaverndarstofu heldur því engu að síður fram að stofan hafi ekki haft „vitneskju um að umrædd frétt hefði birst“ og ber fyrir sig að stofan sé ekki áskrifandi að Stundinni. Þetta kemur fram í svarbréfi stofnunarinnar við fyrirspurn Persónuverndar vegna frumkvæðisathugunar á lögmæti gagnaafhendingarinnar.

Barnaverndarnefnd bað um gögnin og fékk ekki

Gögnin sem Barnaverndarstofa afhenti Stundinni og RÚV í vor voru tekin saman vegna kvartana barnaverndarnefnda á höfuðborgarsvæðinu til velferðarráðuneytisins. Þar er að finna viðbrögð við ásökunum nefndanna, fundargerð um mál barnanna í Hafnarfjarðarmálinu, málsvörn Braga Guðbrandssonar vegna ávirðinga sem bornar höfðu verið á hann en jafnframt ýmis athugasemdabréf Barnaverndarstofu sem vörðuðu önnur mál en fjallað hafði verið um í fjölmiðlum.

Eins og Stundin benti á í fréttaskýringu þann 3. maí síðastliðinn var gagnaafhendingin til vitnis um að Barnaverndarstofa túlkaði upplýsingalög með mun frjálslegri hætti heldur en velferðarráðuneytið sem þá hafði þverneitað að afhenda nokkur gögn um rannsókn á kvörtunum barnaverndarnefnda undan Barnaverndarstofu til ráðuneytisins, einkum á þeim grundvelli að kvartanirnar vörðuðu „tiltekin einstaklingsmál á sviði barnaverndar“.

Voru gögnin metin svo viðkvæm að þingmenn máttu einungis sjá þau í lokaðri skjalageymslu á Alþingi og var óheimilt að tjá sig um efni þeirra. Var jafnframt ákveðið að nefndarfundur velferðarnefndar með Braga Guðbrandssyni yrði lokaður í ljósi þess að þar kynni umræðan að hafa snertifleti við viðkvæm barnaverndarmál.