Ásmundur Einar Daðason félagsmálaráðherra hélt því leyndu fyrir velferðarnefnd Alþingis þann 28. febrúar að skrifstofa félagsþjónustu í velferðarráðuneytinu hefði komist að þeirri niðurstöðu fyrr í mánuðinum að Bragi Guðbrandsson, þáverandi forstjóri Barnaverndarstofu, hefði farið út fyrir starfssvið sitt með afskiptum af barnaverndarmáli í Hafnarfirði sem Stundin fjallaði um á föstudaginn. 

Kastljós greindi frá niðurstöðu umrædds minnisblaðs í viðtali við Ásmund Einar Daðason í kvöld en hingað til hefur algjör leynd hvílt yfir efni þess.

Ásmundur viðurkenndi á fundi velferðanefndar í morgun að í kjölfar rannsóknar velferðarráðuneytisins á kvörtunum barnaverndarnefnda hefðu verið send „tilmæli til aðila málsins“ um að þeir gættu þess að starfsmenn Barnaverndarstofu og barnaverndarnefnda færu ekki út fyrir sín svið í einstökum málum.

Þetta viðurkenndi ráðherra þó ekki fyrr en eftir að Halldóra Mogensen, formaður velferðarnefndar, hafði gengið á eftir honum með þá spurningu hvort einhver hefði fengið tilmæli vegna málsins og brýnt fyrir ráðherra að greina satt og rétt frá.

Það var ekki fyrr en nú í Kastljósi sem í ljós kom að Bragi Guðbrandsson, forstjóri Barnaverndarstofu, fékk tilmæli frá ráðuneytinu eftir að skrifstofa félagsþjónustu komst að þeirri niðurstöðu að hann hefði farið út fyrir starfssvið sitt. Um er að ræða minnisblað frá 6. febrúar 2018, en í umsögn sem ráðuneytið sendi úrskurðarnefnd um upplýsingamál vegna kæru Stundarinnar á synjun upplýsingabeiðni um minnisblöð er varða kvartanir barnaverndarnefnda kemur fram að minnisblaðið frá 6. febrúar fjalli um Hafnarfjarðarmálið.

Tilefni opna fundarins fundarins í morgun var forsíðuumfjöllun Stundarinnar frá því á föstudag þar sem greint var frá því að Bragi hefði, í samráði við föður málsaðila í barnaverndarmáli, beitt sér fyrir því að maður, sem barnaverndarnefnd og meðferðaraðili óttuðust að hefði brotið kynferðislega gegn dætrum sínum, fengi að umgangast þær.

Fram kom í umfjöllun Stundarinnar að aðstoðarmaður Ásmundar auk lögfræðings og skrifstofustjóra í velferðar- ráðuneytinu, hefði tekið við gögnum um málið – símtalslýsingu og tölvupóstssamskiptum sem Stundin birti í dag – fyrir hönd ráðherra á fundi þann 31. janúar 2018.

Þannig hefði Ásmundi Einari mátt vera kunnugt um eðli afskipta Braga Guðbrandssonar af umræddu barnaverndarmáli áður en hann mætti á fund velferðarnefndar þann 28. febrúar en látið hjá líða að greina nefndarmönnum frá því sem hann vissi. 

Eftir opna fundinn í morgun og upplýsingarnar sem fram komu í Kastljóssviðtalinu í kvöld liggur fyrir að á fundi  velferðarnefndar þann 28. febrúar hélt Ásmundur Einar því leyndu fyrir velferðarnefnd – þeirri þingnefnd sem hefur eftirlit með embættisfærslum hans – að með afskiptum sínum af hinu viðkvæma barnaverndarmáli í Hafnarfirði hefði Bragi Guðbrandsson farið út fyrir starfssvið sitt að mati ráðuneytisins. 

Mynd: Skjáskot af RÚV

Einar Þorsteinsson, spyrill í Kastljósi, lýsti minnisblaðinu frá skrifstofu félagsþjónustu til ráðherra með eftirfarandi hætti í kvöld:

„Niðurstaðan er að forstjóri hafi ekki gerst brotlegur við lög en við rannsókn málsins hafi komið fram að hann hafi farið út fyrir starfssvið sitt og er ráðherra hvattur til að senda forstjóra bréf með tilmælum um að gera það ekki aftur.“

Aðspurður hvort slík tilmæli hefðu verið send sagði ráðherra: „Þessi niðurstaða og þessi sömu tilmæli sem þú vitnar til voru send á aðila málsins við lok afgreiðslu þess.“ Af ráðherra mátti skilja að efni tilmælanna væri í anda niðurstöðu minnisblaðsins.